TƏDBİRLƏR

“İnformasiya təhlükəsizliyi və informasiya texnologiyaları” Ümumukrayna Assosiasiyası (VAIBIT) və Ədliyyə orqanlarının Açarların Sertifikatlaşdırılması Akkreditə Mərkəzi tərəfindən təşkil olunmuş beynəlxalq PKI Forum UA - 2019, 2 - 3 oktyabr 2019-cu il tarixlərində Ukraynanın Kiyev şəhərində keçirilmişdi.

Xeberler.az bildirir ki, forumun əsas məqsədi ekspertlər, dövlət qurumlarının, biznes və ictimai birliklərin nümayəndələri arasında müzakirə, fikir və təcrübə mübadiləsi üçün informasiya platformasının yaradılmasından ibarət olmuşdur. İkigünlük forumda rəqəmsal imzaların etibarlı elektron xidmətlərə keçidi, etibarlı xidmətlərdə kibertəhlükəsizlik, Ukraynadakı eDIAS nümunəsi, Avropa Birliyi katibliyində etibarlı xidmətlər sahəsindəki tendensiyalar, Əşyaların İnternetində təhlükəsizlik, etibarlı xidmətlər sahəsində Avropa Birliyi nümunələri və s. haqqında təqdimatlar və mövzular müzakirə edilmişdir.

“Asan İmza”nın operatoru, Rəqəmsal Ticarət Qovşağı (RTQ) layihəsinin partnyoru, həmçinin Azərbaycanda Mobile-ID layihəsi üzrə konsorsiumun rəhbəri, eyni zamanda Milli Mobil İdentifikatorların Qlobal İttifaqının (GANMI) həmtəsisçisi olan B.EST Solutions şirkətinin direktoru və təsisçisi, xanım Jana Krimpe «Ukrayna hökumətində və dünyada elektron hökumət layihələri və həllərində PKI texnologiyası adlı sessiyada iştirak etmişdir. Təqdimat zamanı həmçinin Azərbaycan və Ukrayna arasında etibarlı xidmətlərin təqdim edilməsi sahəsində əməkdaşlıq, Azərbaycanın Rəqəmsal Ticarət Qovşağı çərçivəsində ölkələr arasında transsərhəd elektron xidmətlər və uyğun etibarlı xidmətlərin yaradılması müzakirə edilmişdir.

Forum – Forumun Qətnaməsinin nəzərdən keçirilməsi və GDPR üzrə ilkin addımların müzakirəsilə başa çatmışdır.

Forum, əsasən dövlət orqanlarına, inzibati xidmətlər göstərən təşkilatlara, notariatlara, kibertəhlükəsizlik üzrə mütəxəssislər və elektron identitet və elektron rəqəmsal imzalar sistemlərini işləyib hazırlayanlara, mobil operatorlara, bank təşkilatları və ödəniş xidmətlərinin təchizatçılarına, hüquqşünaslar və məhkəmə ekspertlərinə, akademik sektor və standartlaşdırma orqanlarına, fərdi investorlara, İT xidmətlərinin təchizatçılarına istiqamətlənmişdir.

Xanım Krimpenin işgüzar səfəri, Ukraynanın Baş nazirinin müavini, Ukraynanın Rəqəmsal Transformasiya üzrə naziri cənab Mixail Fyodorovla uğurlu görüşü ilə yadda qaldı. Görüşdə ölkələr arasında təcrübə mübadiləsi aparılmış, iqtisadi əməkdaşlığı əhəmiyyətli dərəcədə yaxşılaşdıran Azərbaycanın Rəqəmsal Ticarət Qovşağında ölkələr arasında mümkün əməkdaşlıq, transsərhəd elektron xidmətlərin yaradılması imkanları müzakirə edilmişdir. Görüşdə Azərbaycan m-Rezidentlik layihəsi ilə bağlı təcrübəsini də bölüşdü. Jana Krimpe nazir Fyodorovun rəhbərlik etdiyi yeni komandanın yüksək peşəkar və innovativ yanaşmasını qeyd etdi.

Qeyd etmək lazımdır ki, Azərbaycan mobil rəqəmsal identitetin istifadəsi və onun müxtəlif dövlət və özəl elektron xidmətlərə inteqrasiyası üzrə dünyada qabaqcıl yerlərdən birini tutur. Bura mobil rezidentlik kimi “Asan İmza”nın, Azərbaycan Respublikasının Prezidenti yanında İqtisadi İslahatların Təhlili və Kommunikasiya Mərkəzi tərəfindən hazırlanan və dövlət-özəl əməkdaşlıq prinsipinə əsaslanan Rəqəmsal Ticarət Qovşağına inteqrasiyasını da daxil etmək lazımdır.