TƏDBİRLƏR

Aprelin 8-də Vergilər Nazirliyinin Tədris Mərkəzində Milli Mühasiblər Forumu keçiriləcək.

Xeberler.az-ın məlumatına  görə, tədbirdə Maliyyə Nazirliyinin, Azərbaycanın Sahibkarlar (İşəgötürənlər) Təşkilatları Milli Konfederasiyasının, Vergilər Nazirliyinin, Azərbaycan Respublikası Auditorlar Palatası nümayəndələrinin çıxışları nəzərdə tutulub.

Forumda mühasibat uçotunun sertifikasiyası üzrə qabaqcıl təcrübənin Azərbaycanda tətbiqi, kiçik və orta şirkətlərdə mühasibatlığın mövcud problemləri və onların həlli yolları, ali təhsil müəssisələrində mühasibatlıq üzrə tədrisin metodikası və təhsilin əyani vəsaitlərlə təmini problemləri və digər mühüm məsələlər də nəzərdən keçiriləcək.

Tədbir zamanı maliyyə uçotunda informasiya həllərinin və bulud texnologiyalarının tətbiqi də müzakirə olunacaq.

 SERP (Sinam Müəssisə Resurslarının İdarə Edilməsi) sistemi misalında forum iştirakçıları belə texnologiyaların üstünlükləri haqqında məlumatlandırılacaq.

Hazırda SERP sistemi 100-dən artıq dövlət təşkilatında və ali təhsil müəssisəsində uğurla tətbiq edilməklə yanaşı iri özəl təşkilatlarda da, o cümlədən banklarda, neft şirkətlərində və digər biznes-qurumlarda da isifadə olunmaqdadır. 

SERP sistemi maliyyə və mühasibat uçotu hesabatlarının mərkəzləşdirilmiş qaydada, bulud texnologiyaları əsasında aparılmasını təmin edir.

Vergilər Nazirliyinin iştirakı ilə Azərbaycan Sahibkarlar (İşəgötürənlər) Təşkilatları Milli Konfederasiyası tərəfindən təşkil olunan forum Maliyyə Nazirliyinin layihəsi çərçivəsində 100-dən artıq təşkilatın qoşulduğu SERP avtomatlaşdırılmış informasiya sisteminin yaradıcısı SINAM şirkəti tərəfindən dəstəklənir. 

Məltəm Talıbzadə