TƏDBİRLƏR

Martın 29-da Masallı Rayon İcra Hakimiyyətində “ASAN Həyat” kompleksində çalışan "ASAN könüllülər"lə görüş keçirilib.

Xeberler.az  bildirir ki, görüşdə çıxış edən Masallı Rayon İcra Hakimiyyətinin başçısı Rafil Hüseynov bildirib ki, Azərbaycan Respublikasının Prezidenti İlham Əliyevin müvafiq Sərəncamı ilə təsdiq edilmiş “Azərbaycan gəncliyi 2017-2021-ci illərdə” Dövlət Proqramında dövlət orqanlarına gənclərin potensialından daha səmərəli istifadə etmək, cəmiyyətin bütün sahələrində gənclərin fəal iştirakına şərait yaratmaq, onlara peşə vərdişini aşılamaq, təcrübi biliklərini artırmaq, onların yaradıcı və innovativ potensialının üzə çıxarılmasını dəstəkləmək və könüllülük hərəkatını inkişaf etdirmək vəzifəsi qoyulub.

Qeyd olunub ki, Masallı gəncləri arasında könüllülük fəaliyyətinin daha geniş təşviq edilməsi məqsədilə bu fəaliyyətlə ilkin olaraq 20 gənc müxtəlif işlərə cəlb olunub.

R.Hüseynov çıxışında "ASAN xidmət” mərkəzində çalışan könüllülərin fəaliyyətinə xüsusi önəm verildiyini, savadlı, müasir dünyagörüşlü, vətənpərvər, milli köklərə bağlı, şəxsi keyfiyyətləri yüksək olan gənc peşəkarların yeni dövrün əsas inkişaf lokomotivi sayıldığını qeyd edərək son dövrlər dövlət qulluğunda çalışanların əksəriyyətinin məhz gənclər olduğunu diqqətə çatdırıb.

Masallı şəhərindəki "ASAN xidmət” mərkəzinin direktoru Vidadi Muxtarov çıxışında "ASAN könüllülərin" müsbət fəaliyyət nümunəsi olduğunu və bunun cəmiyyət tərəfindən razılıqla qarşılandığını bildirib.

“ASAN könüllülər”dən Əli Əsədov, Savalan İmanov, Elşən Talıbov və başqaları çıxış edərək onlara göstərilən etimada, diqqət və qayğıya görə dövlətimizin başçısına minnətdarlıqlarını bildiriblər.

Tədbirdə “ASAN könüllüləri” maraqlandıran suallar cavablandırılıb.