PROQRAMLAR

Ofis proqramları deyəndə hər kəsin ağlına ilk gələn Microsoft Office proqramları olur. Lakin Microsoft Office proqramlarından faydalanmaq üçün müəyyən məbləğ ödəmək və ya pirat proqramlardan istifadə etmək lazımdır.

Xeberler.az özünü həm əlavə xərclərdən, həm də zərərverici proqramlardan qorumaq istəyənlər üçün Microsoft Office-ə  alternativ pulsuz ofis  proqramlarını təqdim edir.

OpenOffice

OpenOffice 15 ildən çoxdur ki, bazarda mövcud olan və açıq mənbə proqramları arasında böyük rəğbətlə qarşılanan proqramlardan biridir. Bu paketdə mətn fayları, cədvəllər, qrafiklər, təqdimatlar, verilənlər bazası və bir sıra digər ümumişlək fayl tipləri yaratmaq üçün alətlər mövcuddur.

Proqram məlumatları standart açıq formatda saxlayır, bu da həmin faylları digər proqramlarda istifadə etməyə imkan verir. Həmçinin Microsoft Office faylları ilə işləməyə də imkan verir. Apache şirkəti daima proqrama yeni özəlliklər, alətlər əlavə edərək fəaliyyət imkanlarını genişləndirir, istifadəçi interfeysini sadələşdirir.

Proqramı yükləmək üçün keçiddən istifadə edin.

LibreOffice

Proqram 2010-cu ilə qədər Apache OpenOffice proqramının daxili komponenti kimi fəaliyyət göstərsə də, daha sonra müstəqil fəaliyyət göstərməyə başladı. Əsas strukturuna görə eyni olsa da, OpenOffice-ə nisbətən daha geniş imkanlar təqdim edir, həmçinin interfeysi daha rahat və əlverişlidir. Bu proqramda da mətn, cədvəl, təqdimat və s. kimi faylları yaratmaq, redaktə etmək mümkündür. Burada da Microsoft Office fayllarını rahatlıqla istifadə və redaktə etmək imkanları var. Həmçinin burada PDF formatlı fayllara elektron imza əlavə etmək də mümkündür. Proqram daim təkmilləşdirilməyə davam edir.  Hər dəfə  yeni versiyada  daha az xətalar və yeni funksiyalarla qarşımıza çıxır.

Proqramı yükləmək üçün keçiddən istfadə edin.

Google Docs

Əgər sizin internetə daimi çıxışınız vasa,  Google Docs sizin üçün əlverişli seçim ola bilər. Google Docs ofis  proqramlarının veb-əsaslı fəaliyyət göstərməsinə baxmayaraq olduqca geniş funksiyalara sahibdir. Burada həm mətn, həm cədvəl, həm də təqdimat faylarını asanlıqla yarada və redaktə edə, eyni zamanda Microsoft Office fayllarını, PDF faylları da aça və redaktə edə bilərsiniz. Google Docs kompüterin yaddaşında yer tutmadığı kimi burada yaradılan faylları da kompüterin yaddaşına yükləməyə ehtiyac yoxdur. Belə ki, fayllar hər bir Google hesabı üçün ayrılan 15 qiqabaytlıq bulud yaddaşında avtomatik saxlanılır. Həmçinin Google Docs-u digər Google məhsulları ilə inteqrasiya etmək, faylları birbaşa keçidlərlə paylaşmaq mümkündür, hətta bir faylda eyni anda bir neçə nəfərin işləməsi də mümkündür.

Proqrama daxil olmaq üçün keçiddən istifadə edin.

Murad Məmmədzadə