E - HÖKUMƏT

AMEA-nın nəzdində fəaliyyət göstərən “Azərbaycan Milli Ensiklopediyası” Elmi Mərkəzi və Azərbaycan Milli Ensiklopediyası sisteminin veb-saytlarının təqdimat mərasimi keçirilib.

AMEA-dan Xeberler.az-a verilən məlumata görə, öncə İnformasiya Texnologiyaları İnstitutunun şöbə müdiri Gülnarə Nəbibəyova Elmi Mərkəzin ame-merkez.gov.az veb-saytı haqqında məlumat verib.

Onun sözlərinə görə,  institutun mütəxəssisləri tərəfindən hazırlanmış sayt AR Nazirlər Kabinetinin qərarı ilə təsdiq edilmiş “Dövlət orqanlarının internet informasiya ehtiyatlarının yaradılması və idarə edilməsinə dair Tələblər”ə və AR Xüsusi Dövlət Mühafizə Xidmətinin tələblərinə uyğunlaşdırılmış, təhlükəszilik tam şəkildə təmin olunub.

Azərbaycan, rus və ingilis dillərində fəaliyyət göstərən saytın Ana səhifəsi “Haqqımızda”, “Struktur”, “Azərbaycan Milli Ensiklopediyası”, “Xəbərlər”, “Rəsmi sənədlər”, “Elanlar” və “Qalereya” bölmələrindən ibarətdir. Ən son texnologiyalar əsasında yaradılmış saytda əhatəli axtarış sistemi, xəritə və faydalı linklər də mövcuddur.

ame-merkez.gov.az-ın “Xəbərlər” bölməsinin siyasəti haqqında məlumat verən  institutun sektor müdiri Əfruz Qurbanova bildirib ki, veb-saytda Mərkəzin fəaliyyəti, burada təşkil olunan tədbirlər, görüşlər, yeni nəşrlər, müsahibələr, çıxışlara dair məlumatları yerləşdirmək məqsədəuyğundur.  

Sonra  institutun elmi işçisi Yusif Sadıyev Azərbaycan Milli Ensiklopediyası sisteminin ensiklopediya.gov.az veb-saytını təqdim edib. Onun sözlərinə görə, Mərkəzin veb-saytından birbaşa keçidin mümkün olduğu sistemdə çoxsaylı ensiklopedik lüğətlər və onların izahları onlayn şəkildə yerləşdirilib və bu proses davam etməkdədir.

Y.Sadıyev saytın axtarış sistemi haqqında məlumat verərək qeyd etdi ki, sistemdə söz, əlifba və cild üzrə axtarış aparmaq mümkündür.  

Məltəm Talıbzadə