E - HÖKUMƏT

AMEA-nın institut və təşkilatlarının veb-saytlarının  yaradılması və idarə edilməsinə dair monitorinq aparılıb.

İnstitutdan Xeberler.az-a verilən məlumata görə, monitorinq AMEA İnformasiya Texnologiyaları İnstitutu tərəfindən həyata keçirilib.  

Monitorinqin ilkin nəticələri haqqında AMEA İnformasiya Texnologiyaları İnstitutunun şöbə müdiri Gülnarə Nəbibəyova məlumat verib.

Gülnarə Nəbibəyova görülən işlərin AMEA Rəyasət Heyətinin “AMEA-nın elmi müəssisə və təşkilatlarının veb-saytlarının monitorinqi haqqında” qərarına əsasən aparıldığını bildirib. Veb-saytların yaradılmasına və idarə edilməsinə dair tələblərin işlənildiyini söyləyən şöbə müdiri bu tələblərin AR Nazirlər Kabinetinin “Dövlət orqanlarının İnternet informasiya ehtiyatlarının yaradılması və idarə edilməsinə dair Tələblər” haqqında Qərarı əsasında hazırlandığını söyləyib. 

Gülnarə Nəbibəyova hazırlanan tələblər haqqında məlumat verib. O, veb-saytların ünvanı, dili, informasiyanın yerləşdirilməsi və onun əldə edilməsi, saytların dizaynına aid tələblərin işlənildiyini bildirib.

Sonra veb-saytların bir sıra parametr üzrə monitorinqinin nəticələri təqdim edilib. Veb-saytların mövcudluğu, o cümlədən domen zonaları, domen adların uyğunluğu, xəbərlərin aktuallığı, veb-saytların dil versiyaları, loqonun, veb-saytlarda axtarış sistemlərinin, sayğacın, saytların xəritəsinin (rubrikator) mövcudluğuna dair tələblər üzrə nəticələri nəzərə çatdırılıb. 

Sevinc Çəltikova