AZNET

AMEA Rəyasət Heyətində institutun mütəxəssisləri tərəfindən hazırlanmış veb-saytların təqdimatına həsr olunmuş müşavirə keçirilib.

Tədbirdə Azərbaycan Dövlət Dəniz Akademiyası, AMEA Kataliz və Qeyri-üzvi Kimya İnstitutunun veb-saytları və www.ikt.az saytının yeni dizaynı müzakirə olunub.

AMEA-dan Xeberler.az-a verilən məlumata görə, institutun 16 saylı şöbəsinin müdiri Gülnarə Nəbibəyova veb-saytları təqdim edərək onların strukturu və dizaynı haqqında ətraflı məlumat verib. Veb-saytların onların yaradılması və idarə edilməsinə dair tələblərə cavab verdiyini, təhlükəsizliyinin tam şəkildə təmin olunduğunu diqqətə çatdırıb.

G.Nəbibəyova bildirib ki, Azərbaycan Dövlət Dəniz Akademiyasının 3 dildə (Azərbaycan, rus və ingilis) fəaliyyət göstərəcək veb-saytında “Xəbərlər”, “Elanlar”, “Akademiya haqqında”, “Təhsil”, “Elm”, “Beynəlxalq fəaliyyət”, “Tələbə həyatı” kimi bölmələr yer alıb, həmçinin akademiyada təşkil olunan mühüm tədbirlər haqqında foto və video informasiya “Fotoqalereya” və “Videoqalereya” bölmələrində öz əksini tapıb.

AMEA Kataliz və Qeyri-üzvi Kimya İnstitutunun veb-saytında elanlar və müxtəlif kateqoriyalar üzrə xəbərlərin yerləşdirildiyini söyləyən məruzəçi saytın güclü axtarış sisteminə malik olduğunu bildirib.

 Azərbaycan və ingilis dillərində fəaliyyət göstərəcək saytda “İnstitut haqqında”, “Elmi fəaliyyət”, “Dissertasiya şurası”, “Beynəlxalq əməkdaşlıq”, “Dövri nəşrlər”, “Rəsmi sənədlər”, “Konfranslar” kimi bölmələrin də yer aldığını nəzərə çatdırdı. İnstitutda keçirilən mühüm tədbirlərin “Fotoqalereya” və “Videoqalereya” bölmələrində öz əksini tapdığını qeyd edib.

Şöbə müdiri bildirdi ki, veb-saytların administrasiyası üçün təyin olunmuş məsul şəxslərə AMEA İnformasiya Texnologiyaları İnstitutunda tədris kursu keçilmiş və saytların idarə edilməsinə dair zəruri biliklər aşılanıb.

Sonra www.ikt.az saytının yeni dizaynı təqdim olunub.

Cəlbedici və fərqli dizayna malik veb-saytın yaxın zamanda istifadəyə veriləcəyi bildirilib.

Günel