Aprelin 6-da Milli Məclisin Hüquq siyasəti və dövlət quruculuğu komitəsinin İnsan hüquqları komitəsi ilə birgə videokonfrans formatında iclası keçirilib.
Xeberler.az bildirir ki, iclası açan komitə sədri Əli Hüseynli gündəliyə 6 məsələnin daxil edildiyini bildirib. O qeyd edib ki, Cinayət Məcəlləsi, Cinayət-Prosessual Məcəlləsi, “İnformasiya, informasiyalaşdırma və informasiyanın mühafizəsi haqqında” və “Media haqqında” qanunlarda dəyişiklikləri nəzərdə tutan qanun layihəsi ikinci oxunuşda birgə müzakirə olunur. Bildirilib ki, dəyişikliklər süni intellekt texnologiyalarından sui-istifadənin qarşısının alınmasına və vətəndaşların hüquq və azadlıqlarının qorunmasına xidmət edir.
Komitə üzvü Kamal Cəfərov layihə barədə məlumat verərək bildirib ki, sənəd süni intellekt vasitəsilə hazırlanmış saxta foto, video və audio materialların yayılmasına qarşı hüquqi çərçivənin formalaşdırılmasını nəzərdə tutur. Layihəyə əsasən, şəxsin razılığı olmadan onun görüntü və ya səsindən istifadə edilərək saxta məzmun hazırlanması və yayılması, o cümlədən pornoqrafik materialların hazırlanması cinayət məsuliyyəti yaradır.
İnsan hüquqları komitəsinin sədri Zahid Oruc çıxışında süni intellekt əsaslı hücumların milli təhlükəsizlik üçün yaratdığı risklərdən danışıb və bu sahədə beynəlxalq əməkdaşlığın vacibliyini vurğulayıb.
İclasda iştirak edən Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev isə qeyd edib ki, süni intellektlə yaradılan saxta məzmunlar həm fərdlərin nüfuzuna, həm də ictimai sabitliyə ciddi təhdid yaradır.
Müzakirələrdə bir sıra deputatlar, o cümlədən Qüdrət Həsənquliyev, Tənzilə Rüstəmxanlı, Elçin Mirzəbəyli və digərləri çıxış edərək qanun layihəsinin əhəmiyyətini qeyd edib, təkliflərini səsləndiriblər.
İclasda həmçinin Cinayət Məcəlləsində dövlət vəsaitlərindən istifadə ilə bağlı məsuliyyət mexanizmlərinin təkmilləşdirilməsini nəzərdə tutan dəyişikliklər, İnzibati Xətalar Məcəlləsinə əlavələr, eləcə də terrorçuluğa qarşı mübarizə və “Yol hərəkəti haqqında” qanunlara dəyişikliklər müzakirə olunub.
Bundan əlavə, Azərbaycan və Belarus hökumətləri arasında sürücülük vəsiqələrinin qarşılıqlı tanınmasına dair sazişin təsdiqi məsələsinə baxılıb. Qeyd olunub ki, bu sənəd iki ölkə arasında yol hərəkətinin təhlükəsizliyinin artırılmasına xidmət edəcək.
Sonda gündəlikdə olan bütün qanun layihələri Milli Məclisin plenar iclasına tövsiyə edilib.
