STARTAP AZƏRBAYCAN

İndiki zamanda ofis dörd divar arasında stol və stul anlayışından kənara çıxıb. Belə ki, hazırda çalışmaq üçün kompüter və proqramların olması kifayətdir. Bəzən evdə və kafelərdə olan şəraitdə   işləmək o qədər də effektli olmur. Bu səbəbdən ölkəmizdə  yeni iş məkanı konsepsiyası yaranıb – kovorkinq. 

Bakı şəhərinin mərkəzində  yerləşən “Fabrika”  yeni və maraqlı iş şəraitində çalışmaq imkanları təqdim edir. “Fabrika”  müxtəlif sahələrdə ixtisaslaşmış insanlarla tanışlıq mərkəzi, yeni biznes ideyaları yaratmaq üçün xüsusi  məkan və müştərilərlə rahat görüşmək üçün şərait  yaradır.

“Fabrika”-nın icraçı direktoru Tamerlan Məmmədov fabrikin fəaliyyəti, təqdim etdiyi xidmətlər və üstünlükləri ilə bağlı Xəbərlər-ə ətraflı məlumat verib.

Tamerlan Məmmədov deyib ki, şəhərimizdə ilk kovorkinq mərkəzi – FABRİKA ötən il dekabrın 28-də açılıb. Onun sözlərinə görə, mərkəz bir neçə məsələ ilə digər iş mərkəzlərindən fərqlənir.

Həmtəsisçi bu barədə ətraflı məlumat verir:

-“FABRİKA” Bakı Ayaqqabı Fabrikasının binasının ilk mərtəbəsində yerləşir və İntellekt EVİ ilə eyni ofisi paylaşır. Sahəsi 200 kvadrat metr olan FABRİKA-da 2 böyük çalışma zalı, 2 toplantı otağı var.  1-5-ci günlər fəaliyyət göstərən mərkəz həftənin şənbə və bazar günlərini İntellekt EVİ və tədbirlər üçün məkan kimi fəaliyyət göstərir. Fəaliyyətinin ilkin müddətində FABRİKA partnyorlarına (FABRİKA-da müştəri yoxdur hər kəs partnyordur) müəyyən ödəniş qarşılığında yer, Internet, bəzi hüquqi məsələlərdə yardım və ən önəmlisi-Bakıda nadir olan veloparkinq təqdim edir. İlkin mərhələdə İNTELLEKT evi ilə əməkdaşlıq edərək fərqli iqtisadi oyunlar təklif edən FABRİKA eyni zamanda fərqli səpkili master klasslar da təşkil edir”.

İcraçı direktor deyir ki, FABRİKA üzvləri mərkəzin geniş partnyor şəbəkəsindən yararlanaraq poliqrafiya və web xidmətlərə asan çıxış əldə edə bilərlər. Bununla yanaşı mərkəz rezidentlərinə korrespondesiya üçün hüquqi ünvan təqdim olunur. Mərkəzin kitabxanası da fəaliyyət göstərir”.

Tamerlan Məmmədov “Fabrika”-nın ofislərindən istifadə barədə də məlumat verib:

“Fabrika Kovorkinq Mərkəzi üç sahə üzrə fəalliyət göstərir. Belə ki, İş məkanı və ofis – sahibkarlara və istənilən peşənin mütəxəssislərinə çalışmaq üçün yer təklif edir, yəni kovorkinq məkanı, toplantı otaqlar, tədbir zalları – istənilən tədbirlər üçün zallar təqdim olunur, sosial klub – müxtəlif mövzulu sosial layihələr, master-klasslar, təlimlər, kino nümayişlər, vebinarlar, stol üstu oyunlar və s”.

İcraçı direktor qeyd edir ki, ofisləri günlük, həftəlik və aylıq kirayəyə götürülə bilir və müştərilər  iş üçün lazım  olan hər bir imkanla  təmin edilir. Onun sözlərinə görə, ən əsası, kovorkinq xüsusi bir mühit və sinerji yaradır ki, bu da ancaq həmfikirli insanların birgə mühitdə çalışmaları zamanı yaranır.

Qiymətlərə gəlincə bir neçə fərqli paketin mövcud olduğunu deyir:

““Bir həftəlik layihə” iş yeri – 70 AZN, “Bir aylıq qalacam” iş yeri – 150 AZN, “Startupçılar (2 nəfər – 1 ay): iş yeri – 200 AZN, “Startup komanda (3 – 4 nəfər – 1 ay): iş yeri – 300 AZN.

Bundan başqa az öncə qeyd etdiyimiz kimi, FABRİKA-da eyni zamanda iki toplantı otağı mövcuddur. Otaqlar 1+1 və 8+2 formatında dizayn edilmişdir. Toplantı otaqları kovorkinq mərkəzi üzvləri üçün həftənin iş günləri pulsuz istifadə edilə bilməklə yanaşı fərdi şəxslər də müəyyən ödəniş müqabilində bu otaqlardan yararlana bilərlər.
Toplantı otaqları isə “1+1” – 1.5 saat – 10 AZN, “8+2” – 1.5 saat – 25 AZN-dir”.

İcraçı direktor onu da qeyd edib  ki, kovorkinq mərkəzindən istifadə üçün müraciət edən şəxslər ilk öncə nə qədər müddət mərkəzdən istifadə edəcəkləri ilə bağlı  vaxt   seçməlidirlər və bundan sonra komandalarına uyğun  imkanlar təqdim edilir.

 Məltəm Talıbzadə