“Startap Azərbaycan 2015”- in qalibləri açıqlandı - Fotolar

15-05-2015 / 15:45

Startap Azərbaycan yekun təqdimat mərasimi və “Startup Azərbaycan 2015” milli konfransı  keçirilib.

Bu gün Park İnn Otelində “Startap Azərbaycan 2015” layihəsinin yekun təqdimat mərasimi  və “Startap Azərbaycan 2015” milli konfransı keçirilib.

Xeberler.az-ın məlumatına görə, Azərbaycan İnternet Forumunun prezidenti , Startap Azərbaycan Təşkilat Komitəsinin təmsilçisi Osman Gündüz tədbiri açaraq  Startap Azərbaycan çərçivəsində keçiriləcək yekun tədbirlər haqqında məlumat verib.

Rabitə və Yüksək Texnologiyalar nazirinin müavini Elmir Vəlizadə açılış nitqi edib. O,  beynəlxalq  aləmdə,  ölkədə startap və  İnternet biznes sahəsində mövcud durumla  bağlı məlumat verib.  Nazirlik rəsmisi ölkədə bu sektorun inkişafı üçün dövlət tərəfindən  atılacaq  kompleks addımlar haqqında məlumat verib.

Elmir Vəlizadə startaplara dövlət dəstəyinin daha da güclənəcəyini diqqətə çatdırıb.

RYTN yanında İT-nin İnkişafı Dövlət Fondunun icraçı direktoru Elçin Zeynalov da açılış nitqi söyləyib.  O, startap sahəsinin  inkişafı məsələlərinə  toxunaraq bu sahənin Fondun diqqət mərkəzində olduğunu  bildirib. Elçin Zeynalov  Startap Azərbaycan tədbirlərinin ölkədə bu sahənin inkişafında mühüm töhfələr verdiyini qeyd edib. Fondun direktoru  Dövlət Fondunun həyata keçirdiyi layihələr və  gələcək planlarla bağlı da məlumatı iştirakçılara çatdırıb.

Daha sonra  “Azərbaycanın startap mühiti (ekosistemi) : problemlər və perspektivlər”  mövzusunda milli konfrans öz işinə başlayıb. Bir paneldən ibarət olan konfransda panelçilər Neuron Technologies şitkətinin direktoru İsmayıl Ələkbərov, Ülvi Aslanov ( YT Park), Fərid Kazımov (Startap Azərbaycan), Rəşad Məmmədli (Baku Business Factory) mövzu ətrafında tezislərini konfrans iştirakçılarına çatdırıblar.

Müzakirələrdə və diskussiyalarda Anar Rüstəmov (QAFQAZ Universiteti), Orxan Əhmədov (Startap Azərbaycan), Vahid Qasımov (Azərbaycan Universiteti ), Tamerlan Məmmədov ( FABRİKA Kovorkinq Mərkəzi), Aydın Hüseynov (təhsil eksperti), İlqar  Abdullayev (E-gov Portalı), Anar Məmmədov, Rəşid Əliyev(BethClip)  və digərləri çıxış ediblər.Çıxışlarda startap sektorunun  inkişafını  ləngidən problemlər qeyd edilib və inkişafa kömək edəcək  təkliflər verilib.  
Nazir müavini Elmir Vəlizadə və Dövlət Fondunun icraçı direktoru Elçin Zeynalov və panelçilər qaldırılan məsələlərə münasibətlərini  bildiriblər və aidiyyatı suallar cavablandırılıb.
Osman Gündüzün moderatorluğu ilə keçirilən  konfrans maraqlı tərəflərin iştirakı ilə müxtəlif müzakirələrlə davam edib.

Daha  sonra Startap Azərbaycan qaliblərinin təqdimatı başlayıb. Osman Gündüz “Startap Azərbaycan 2015” çərçivəsində görülən işlərlə təqdimat iştirakçılarını tanış edib.

O, ötən  müddət ərzində Startap Azərbaycan çərçivəsində Bakı Dövlət Universitetində,  İqtisad Universitetində , Texniki Universitetdə  və Memarlıq və İnşaat Universitetində  Startap toplantılarının keçirildiyini,  maarifçilik işlərinin yüksək səviyyədə təşkil olunduğunu diqqətə çatdırıb. Osman Gündüz ötən illərdən fərqli olaraq bu sahədə Elektron Hökumət Portalı ilə birgə maariflçilik işlərinin və görüşlərin keçirildiyini  bildirib. 

Eyni zamanda  Startap Azərbaycan yarışmasına qatılan milli startap komandalarının üzvlərinə beynəlxalq və yerli ekspertlərin iştirakı ilə təlimlərin keçirildiyini diqqətə çatdırıb.

Osman Gündüz  üç ay davam edən Startap Azərbaycan  müsabiqəsinə  34 startap  layihəsinin təqdim edildiyini və 1-ci mərhələ səsvermə nəticəsində 13 yarımfinalçı startapın seçildiyini bildirib.
O, 8 ekspert tərəfindən layihələrin  5 istiqamət üzrə (layihənin komandası, layihənin davamlılığı, layihənin ideyası və cəlbediciliyi, layihənin gəlirliliyi, layihənin əhatə dairəsi) 10 ballıq sistemlə qiymətləndirildiyini diqqət çatdırıb.

Osman Gündüz qeyd edib ki, bu il müsabiqəyə 3 xüsusi nominasiya  da daxil edilib.

Təqdimat mərasimində ilk öncə bu 3 xüsusi nominasiyalar üzrə fərqlənənlərin adları açıqlanıb. Belə ki, “Ən motivasiyalı komanda”  nominasiyası üzrə MyTagram, “GoMap mobil tətbiqləri” üzrə  Baku Parking, “E-gov mobil tətbiqləri” nominasiyası üzrə isə RobiGuide layihəsi seçilib.

Yarışmanın yekununda  4 startap layihəsinin,  Appol-Ustad,  Portret.al, Baku Parking və BillBoard.az  startaplarının uğur qazanaraq finala çıxdığı elan edildi.  

Təqdimat mərasimində finala çıxan və fərqlənən hər bir startap layihəsinin komandası öz layihələri ilə bağlı qısa müddətli təqdimatlar ediblər.

Nazir müavini Elmir Vəlizadə və özəl şirkətlərin rəhbərləri qaliblərə və fərqlənənlərə  mükafatlar və diplomlar təqdim ediblər.

Konfransda müzakirələrin yekunu olaraq təkliflərin  hazırlanacağı və hökumətə təqdim ediləcəyi  də vurğulanıb.

Bu gün həmçinin yekun tədbirlər çərçivəsində finala çıxan startaplarla investorların və İT sahəsində fəaliyyət göstərən şirkət nümayəndələrinin  qapalı görüşü ( pitç sessiya) təşkil olunub. Görüşdə iştirak edən investorların  qalib gələn  startap komandasının üzvləri arasında gələcək  işbirliyi ilə bağlı müzakirələri olub.  Komandalar bir daha investorlara öz layihələrinin  incəlikləri ilə bağlı məlumatlar veriblər.

Startap Azərbaycan yekun tədbirlərində və milli konfransda startaplar sahəsində bütün maraqlı tərəflər -  startup komandaları, dövlət qurumları və texnoparkların nümayəndələri, İnvestorlar və İT şirkətlər, mentorlar və ekspertlər  iştirak edib.

“Startap Azərbaycan 2015” layihəsinin yekun təqdimat mərasimi ,  milli konfransla bağlı bütün fotolar və video startup.az-da  yerləşdirilib. 

Startap Azərbaycan layihəsi Azərbaycan İnternet Forumunun təşkilatçılığı ilə keçirilir. 

Layihəyə Rabitə və Yüksək Texnologiyalar Nazirliyi yanında İT-nin İnkişafı Dövlət Fondu, Elektron Hökumət Portalının operatoru - MHM və Yüksək Texnologiyalar Parkı dəstək verir.

Startap Azərbaycan-ın Akademik partnyoru  ADA Universitetidir. 
İnfiPro, SİNAM ,  Cybernet, Fabrika Kovirkinq Mərkəzi  və Happy Baku şirkətləri də Startap Azərbaycan-a dəstək verirlər.

 

Məltəm Talıbzadə

Fotolar: Tərlan Yusif

Nəcəf Nəcəfli 

 


ŞƏRHLƏR






sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.