RƏQƏMSAL DÜNYA

Məlumat verdiyimiz kimi, “Altun Kitab”  nəşriyyatı  tərəfindən Azərbaycan dilinin lüğət ehtiyatına daxil olan bütün  sözlərin toplandığı yeni sayt yaradılırdı.

Saytda sözlərin düzgün yazılışı  ilə yanaşı, sözlər bir neçə formada yanlış yazanda belə sistem həmin sözü və ona oxşar olan sözləri çıxaracaq. Bundan əlavə, deyilişi və yazılışı fərqlənən bir çox sözlərin tələffüzünü dinləmək imkanı olacaq.

Nəşriyyatın direktoru, orta məktəblər üçün Azərbaycan dili dərsliklərinin müəllifi Rafiq İsmayılov bu istiqamətdə  hazırda görülən işlərlə bağlı Xeberler.az-a  ətraflı məlumat verib.

O bildirib ki, orfoqrafiya lüğətinin saytı - orfoqrafiya.az  artıq xidmətə başlayıb və vətəndaşlar  bu saytdan istifadə edə bilir:

“Onlayn orfoqrafiya  lüğətində Azərbaycan dili hissəsi artıq yekunlaşıb. Yəni, Azərbaycan dilindəki sözlərin sistemdə düzgün yazılışı və səsləndirilməsi artıq təmin edilib. İstifadəçilər bu xidmətdən heç bir problem ilə qarşılaşmadan istifadə edə bilir”.

Rafiq İsmayılov bildirib ki, hazırda ingilis və rus  dilllərində olan sözlərin sistemə daxil edilməsi üzərində işləyirlər.

Onun sözlərinə görə, saytda sözlərin izah bölməsində də hələ  işlər davam edir:

“Elə sözlər var ki, onun tələffüzü ilə başqa sözün yazılışı yaxındır və ya üst-üstə düşür. Məsələn, əsl-əsil, sürət-surət. Belə sözlər izahı ilə təqdim ediləcək. İstifadəçilər asanlıqla mürəkkəb sözlərin bitişik, yoxsa defislə, mürəkkəb adlarda sözlərin böyük, yoxsa kiçik hərflə yazıldığını müəyyənləşdirəcəklər. Sözlərin izahı ilə bağlı bazaya əlavələr edilir”.

Naşir qeyd edib ki, layihə ilə bağlı bütün işlər yaxın 2 ay ərzində yekunlaşacaq.

Məltəm Talıbzadə