RƏQƏMSAL DÜNYA

“Altun Kitab”  nəşriyyatı  tərəfindən Azərbaycan dilinin lüğət ehtiyatına daxil olan sözlərin  onlayn orfoqrafiya lüğəti hazırlanır.

Nəşriyyatın direktoru, orta məktəblər üçün Azərbaycan dili dərsliklərinin müəllifi Rafiq İsmayılov Xeberler.az-a  lüğətlə bağlı ətraflı məlumat verib.

O bildirib ki, cəmiyyətdə ən çox orfoqrafiya ilə bağlı problemləri nəzərə alaraq belə bir layihəyə başlayıblar.

Onun sözlərinə görə, hazırda orfoqrafiya lüğətinin saytı - orfoqrafiya.az üzərində işlər davam edir:

“Saytda sözlərin yalnız düzgün yazılışı  olmayacaq. Elə bir sistem yaradırıq ki, sözlər bir neçə formada yalnış yazanda belə sistem həmin sözü və ona oxşar olan sözləri çıxarsın. Bundan əlavə, deyilişi və yazılışı fərqlənən bir çox sözlərin tələffüzünü dinləmək imkanı olacaq”.

Rafiq İsmayılov deyib ki, son orfoqrafiya lüğətində əks olunmuş bütün Azərbaycan sözləri, o cümlədən mürəkkəb adlar sistemə daxil ediləcək:

“Elə sözlər var ki, onun tələffüzü ilə başqa sözün yazılışı yaxındır və ya üst-üstə düşür. Məsələn, əsl-əsil, sürət-surət. Belə sözlər izahı ilə təqim ediləcək. İstifadəçilər asanlıqla mürəkkəb sözlərin bitişik, yoxsa defislə, mürəkkəb adlarda sözlərin böyük, yoxsa kiçik hərflə yazıldığını müəyyənləşdirəcəklər”.

Onun sözlərinə görə, sistemə alınma sözlər də daxil ediləcək. Bir çox sözlərin səsləndirilməsi də mümkün olacaq:

“Artıq 2 min alınma söz peşəkar diktorlar tərəfindən səsləndirilib.

“İstifadəçilər, adətən, sözdə vurğunun yerini də müəyyənləşdirməyə  çalışırlar. Bunun üçün də  sözlərdə vurğulu sait fərqli rənglə veriləcək. Tələffüzünü bilmək üçün isə audio imkan yaradılcaq”.

Naşir qeyd edib ki, hazırda proqram üzərində işləyirlər. Onlayn orfoqrafiya lüğətinin yaxın 2 ay ərzində tam  hazır olacağı və istifadəyə veriləcəyi gözlənilir. Güman edirik ki, belə bir lüğət, ilk növbədə, mətbuat və televiziya işçiləri üçün, eləcə də şagirdlərimiz üçün çox lazımlı bir elektron vəsait olacaq.

Bu resurs istifadəçilər  üçün sözlərin düzgün yazılışında, ofroqrafiya səhvlərinin qarşısının alınmasında təcili yardım funksiyasını yerinə yetirəcək.

Məltəm Talıbzadə