Xeber verdiyimiz kimi, bir neçə gün öncə Nəqliyyat, Rabitə və Yüksək Texnologiyalar Nazirliyinin strukturuna daxil olmayan tabeliyindəki qurum “
Azərmarka” MMC “Azərpoçt” MMC-yə birləşdirilib.
Bir neçə il öncə də "AzEurotel"in təşkilati-hüquqi forması dəyişdirilərək Baktelecom tabeliyinə verilib. Əvvəllər Baktelecom tabeliyindəki çoxsaylı qurumlar da ləğv edilərək Baktelecom-a birlşdirilmişdi.
Məsələyə Azərbaycan İnternet Formunun Prezidenti, ekspert Osman Gündüz münsaibət bildirib:
"Hazırda bildiyim qədər nəhəng regional dövlət telekommunikasiya operatoru olan Aztelekom ilə Bakı şəhəri və ətraf ərazilər üzrə telekommunikasiya operatoru olan digər inhisarçı qurumun- Baktelecom-un birləşdirilməsinə hazırlıq görülür.
NRYTN bu qurumları ölkə üzrə vahid Aztelekom operatoru olaraq birləşdirməyi nəzərdə tutub. Bununla bağlı beynəlxalq məsləhətçi şirkət prosesə cəlb olunub.
Görünən odur ki, Nazirlik ətrafında olan, tabeliyində olan və olmayan qurumların təmərküzləşməsi prosesi gedir. Bu qurumların bir çoxu da inhisarçıdır və birləşmədən sonra, müəyyən müddət üçün daha böyük inhisarçı qurumlar formalaşacaq.
Belə görünür ki, Nazilrik adı çəkilən inhisarçı qurumların vəziyyətini daha da yaxşılaşdırmaq və bundan sonra özəlləşmə məsələsini gündəmə gətirmək istəyir. Əlbəttə, Nazirliyin sektorda vəzəyyəti yaxşılaşdırmaq, korporativ idarəetməni təkmilləşdirmək, özəlləşdirmədən öncə müəssisələrin start vəziyyətlərini yaxşılaşdırmaq istiqamətidəki addımları anlaşılandır.
Xatırlayıram ki, Prezident tərəfindən Nazirin təyinatında da sektordakı bu tip problemlərin tez bir zamanda həllinə diqqət yönəldilmişdi.
Amma düşünürəm ki, bu tip birləşmə və təmərküzləşmə addımlarından öncə telekommunikasiya sektorunda müstəqil tənzimləyici qurumu yaratmaq daha doğru olardı. Bu istiqamətdə müəyyən rəsmi mesajlar olsa da, xeyli müddətdir ki bu sahədə işlər ləngiyir".
Ekspertin sözlərinə görə, 2020-ci ilin sonunda bu proses yekunlaşmalıydı.
"Yuxarıda qeyd olunan birləşmələr, struktur dəyişiklikləri, inhisarçıların birləşməsi, düşünürəm ki, müstəqil tənzimləyici qurum olmadan mövcud rəqabət mühitini daha da pisləşdirə bilər.
Bu baxımdan, fikrimcə hökumət sektorda müstəqil tənzimləyici qurumun- Milli Telekommunikasiya Qurumunun formalaşdırılmasını sürətləndriməli, telekommunikasiya sektorunda səlahiyyət bölgüsü konkretləşməlidir.
Telekommunikasiya sektorunda indiki zamanda kommersiya fəaliyyəti göstərməyən, müstəqil olan, inhisarçılara və özəl sektora bərabər şərait və normal tənzimləyici qaydalar yaratmalı olan dövlət qurumuna ciddi ehtiyac var".
