"SABAH.city Azərbaycanın meqa layihəsidir desək, yanılmarıq. Bakıda, Xətai rayonu ərazisində, Ağ Şəhərin yaxınlığında 20 hektarlıq bir ərazidə nəhəng bir texnoparkın- SABAH.city innovasiya şəhərciyinin salınması nəzərdə tutulub. Layihənin ideyası ETN-in “Yüksək Texnologiyalar Parkı” və SABAH.HUB innovasiyalar mərkəzinə məxsusdur".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspertin sözlərinə görə, əvvəllər AMEA tabeliyində olan YTP 2022-ci ildən ETN tabeliyinə keçib:
"Qeyd etmək lazımdır ki, SABAH.HUB ekosistemdə xeyli oturuşsa da, YTP haqqında bunu demək doğru olmazdı, bu qurum ekosistemdə hələlik öz yerini formalaşdıra bilməyib, ciddi layihələri və töhfələri gözə dəymir".
Osman Gündüz bildirib ki, SABAH.city Azərbaycanın bütün startap və innovasiya ekosistemini, ofis məkanları və kovorkinq mərkəzlərini, tədqiqatlar və araşdırma mərkəzlərini, universitetləri və elmi-tədqiqat institularını fiziki olaraq əhatə edən bir innovativ infrastruktur qurmağı hədəfləyib. SABAH.HUB həm də 25 milyonluq bir SABAH Fondunun formalaşdırılacağını elan edib:
"Ötən günlər təşkil olunan Təhsilin İnkişafı Forumunda YTP-nin rəhbəri layihənin reallaşması istiqamətinə işlərin canlandığını bildirib. Strateji Yol Xəritəsi hazırlanıb. Maraqlı tərəflərlə görüşlər keçirilir. Bir neçə gün öncə Asiya İnkişaf Bankı ilə bu istiqamətdə görüş olub. Şəhərciyin ilkin mərhələsinin açılışı 2026-cı ilə nəzərdə tutulub".
Ekspert bildirib ki, son zamanlar innovasiya və ekositemlə bağlı, təhsil və tədqiqatlarla bağlı açıqlanan beynəlxalq reytinqlərdə Azərbaycanın vəziyyəti elə də xoşagələn görünmür:
"İnnovasiyalar və ekosistemin inkişafı sahəsində isə hətta geriləmişik. Region ölkələrində bu istiqamətdə daha sürətli dinamika görünür, daha böyük investisiyalar gözə dəyir".
Osman Gündüz düşünür ki, SABAH.city kimi nəhəng bir texnopark şəhərciyinin salınması sektorda böyük irəliləyiş yarada bilər:
"Bu layihə ölkədə insan kapitalının inkişafı baxımından, startap və innovasiya ekosistemin inkişafı baxımından, elm, təhsil ve sənaye arasında biliklərin transferi baxımından mühüm əhəmiyyət kəsb edir".
