Cari ilin əvvəlindən “Dövlət satınalmaları haqqında” yeni Qanun qüvvəyə minib. Dövlət satınalmalarının rəqəmsallaşdırılması, eSatınalma portalının (
etender.gov.az) təkmilləşdirilməsi istiqamətidnə son zamanlar bir xeyli işlər görülüb. Artıq bütün satınalmalar “
etender.gov.az” platforması üzərindən elektron formada həyata keçirilir.
Xəbərlər.az məlumat verir ki, bununla bağlı Azərbaycan İnternet Formunun Prezidenti, ekspert Osman Gündüz münasibət bildirib.
Ekspertin sözlərinə görə, son zamanlar Antiinhisar və İnnovasiya və Rəqəmsal İnkişaf Agentliyi (İRİA) tender üçün tələb olunan sənədlərin iştirakçılar tərəfindən kağız formada deyil, birbaşa dövlətə məxsus informasiya resurslarından generasiya olunmaqla əldə edilməsinə də diqqət yetiriblər. Yəni bu sənədlər iştirakçılar tərəfindən sorğu verilən anda, real vaxt rejimində portala yüklənir:
"Mərkəzi Bankın və Dövlət Vergi Xidməti bu istiqamətdə addımları xeyli təqdirəlayiqdir".
Osman Gündüz bildirib ki, tender üçün vacib olan digər sənədlər üçün isə bunu demək mümkün deyil:
"Elə sənədlər var ki, yenə də bununla bağlı dövlət qurumuna müraciət etmək, kağız formada, yaxud epoçtla onları əldə etmək və portala yükləmək lazım gəlir. Maraqlıdır və təəccüblüdür ki, rəqəmsallaşmanın ən çox inkişaf etdiyi, bu dünyada bəlkə də qazanmadığı mükafat qalmayan Əmək və Əhalinin Sosial Müdafiəsi Nazirliyinin qurumlarından tələb olunan arayış (işəgötürənin cəriməsinin olmamamsı haqqında) rəqəmsallaşmayıb. Yəni görünən odur ki, bu arayış tender iştirakçısı tərəfindən ƏƏSMN-ə müraciət edilməklə əldə edilməli və sistemə yüklənməlidir".
Ekspertin sözlərinə görə, Azərbaycan Respublikası Ədliyyə Nazirliyi tərəfindən təqdim edilməli olan arayış da (məhkəmə qərarı ilə müflis elan olunması, sahibkarlıq fəaliyyətinin dayandırılması, borcuna görə əmlakın üzərinə tələbin yönəldilməsi ilə bağlı məhkəmə işləri) oflayn və ya elektron poçtla müraciət etməklə əldə edilərək eSatınalma portalına yüklənməlidir.
Osman Gündüz vurğulayıb ki, son zamanların ən faydalı e-xidmətlərindən biri "məhkumluq haqqında arayış" dır. Bu xidmət DİN tərəfindən tam olaraq rəqəmsallaşdırılsa da arayışın satınalma portalına inteqarsiyası da hələlik reallaşmayıb:
"Bir daha vurğulamaq istərdim ki, burada diqqət çəkən məqam qeyd olunan arayışların aidiyyatı olduğu qurumlarda rəqəmsallaşma səviyyəsinin yetərincə yüksək olmasıdır".
Ekspert ümid edir ki, Antiinhisar, İRİA, Ədliyyə Nazirliyi və ƏƏSMN tenderdə iştirakla bağlı sənədlərin real vaxt rejimində eSatınalma portalına inteqrasiyası üçün zəruri olan addımları atacaqlar.
