RƏQƏMSAL DÜNYA

Ölkədəki bəzi provayderlər təklif etdikləri internet xidmətlərinin qiymətini qaldırmağa başlayıb.

Məsələ ilə bağlı Ailə TV, KATV1, Citynet və digər provayder istifadəçiləri tərəfindən Xeberler.az-a məlumat daxil olub.

Vətəndaşlar qeyd edir ki, bu gün Ailə TV-yə ödəniş etmək istəyərkən onlara bildiriblər ki, internetin qiymətini 5 AZN qalxıb. Yəni, əvvəllər əgər aylıq 13   manat ödəyirdilərsə, indi 18 AZN ödəmək tələb olunub.

Xeberler.az məsələni provayderlərlə dəqiqləşdirməyə çalışıb.

Ailə TV-dən  Xeberler.az-a bildiriblər ki, sadəcə Ailə TV-nin təqdim etdiyi endirmli paketlər ləğv olunub, bunu isə müştərilər qiymət artımı kimi qəbul edirlər.

Şirkətin məlumatında qeyd edilib ki, 1 ildən çoxdur ki, istifadəçilər endirmli  paketlərdən istifadə edirlər.  Bu günlərdə isə endirimlər ləğv edilib və standart qiymətlər tətbiq edilib deyə qiymətlərdə artım var.

Vətəndaşlar qeyd edirik ki, onlarla xəbərdarlıq gəlməyib ki, internetin qiymətində artım olacaq.

Ailə TV-dən isə buna cavab olaraq bidirilib ki, onlar müxtəlif reklamlarla, televiziya ilə bu barədə məlumatı ictimaiyyətə çatdırıb.

Bu arada KATV internet televiziya provayderi də bu endirim paketini ləğv etdiyini bildirib.

Manatın devalvasiyasından sonra yaranan iqtisadi böhranla bağlı bildirmişdik ki , ölkənin əsas internet təchizatçısı  Delta Telecom qiymətləri qaldırmayacaq. Bu haqda şirkət də rəsmi olaraq açıqlama vermişdi.

Bununla belə Xeberler.az -ın bir müddət öncə məlumat verdiyi  kimi, provayderlərin  Delta Telecom-a külli miqdarda borcları var. Hətta məsələ o qədər ciddiləşib ki, Delta Telecom  pullarını ala bilmədiyi üçün  provayderləri məhkəməyə də verməyə hazırlaşır.

Görünür ki, provayderlər də bu məbləği vətəndaşlardan toplamağa çalışır.

Görünən budur ki, provayderlər müxtəlif bəhanələrlə,  endirim paketlərinin ləğvi adı altında  qiymətləri artırmağa davam edir.

İnternetin ölkə daxilində topdan-satış qiymətlərinin qaldırılmadığı bir şəraitdə provayderlərin qiymətləri birdən- birdən  40- 50 faiz  qaldırması güman ki, rəsmi orqanların , aidiyyatı qurumların da diqqətini cəlb edəcək.

Xatırladırıq ki, ölkə başçısının  rəhbərliyi altında yaxın günlərdə keçirilən toplantılarda süni qiymət artımlarına da ciddi reaksiya  verilib və bu istiqamətdə rəsmi qurumlar tərəfindən ciddi tədbirlərin görüləcəyi diqqətə  çatdırılıb.  

Məltəm Talıbzadə