TƏHLİL VƏ RƏYLƏR

Son günlərdə  məlumat vermişdik ki, yerli provayderlərin ölkənin əsas internet təchizatçısı olan Delta Telecom-a külli miqdarda borcu yaranıb. Bu səbədən də adı çəkilən şirkət beynəlxalq telekommunikasiya operatorları ilə ödənişləri edə bilmədiyindən ölkədə internetin kəsilməsi ehtimalı yaranıb.

Təkcə dörd dövlət provayderinin Delta Telecom-a 10 milyon manatadək borcu olduğu bildirilirdi.

Xeberler.az bu məsələni proveydərlərlə dəqiqləşdirib ki, həqiqətən də onların iddia olunan məbləğdə borcları varmı və bu borcalarını ödəyirlərmi?

Ölkənin 35 faiz internet bazarına nəzarət edən Bakinternet dövlət provayderinin borcunun olması ilə maraqlandıq.

Bakı Telefon Rabitəsi  İstehsalat  Birliyindən Xeberler.az-a verilən məlumata görə, onların həqiqətən də Delta Telecom-a böyük məbləğdə borcu olub. Bu borclar isə uzun müddət ödənişlərin edilməməsi səbəbindən yaranıb.
Məlumatda qeyd edilib ki, hazrda bu borcların ödənilməsinə başlanıb. Artıq məbləğin bir hissəsi  ödənilib.

Ölkənin internet bazarının 10 faizdən də çox hissəsinə nəzarət edən daha bir dövlət provayderi  Aztelekom  da Xeberler.az-a Delta Telecoma-a borclarının olduğunu təsdiqləyib.

Onlar da istifadəçilər tərəfindən ödənişlərin gecikməsi ilə bağlı uzun müddət Delta Telecoma-a olan borcların ödənilməsində problemlərin olduğunu bildirib.

Qurumdan məlumat verilib ki, hazırda bu borcların ödənilməsi davam edir.

SAZZ şirkətindən isə onların az məbləğdə borclarının olmasını bildiriblər.

Qeyd edilib ki, şirkət hər ay  ödənişi vaxtında edib .  Bildirilib ki, ola bilər ki, yalnız bir neçə ayın ödənişi qalsın.

 Digər provayder Azeurotel ilə məsələ ilə bağlı əlaqə saxlamağa  çalışsaq da, mümkün olmayıb.

Delta Telecom-dan aldığımız məlumata görə , digər özəl provayderlərin də bu quruma milyonlarla manat borcu yaranıb.

 Hazırda borcların ödənilməsi istiqamətində işlərin aparıldığı qeyd edilib.

Ötən  yazılarımızda məlumat vermişdik ki  “doğma provayderlər” də də internet ödənişləri ilə bağlı ciddi problemlər olub . Belə ki ,əldə etdiyimiz məlumata görə, dövlət operatorlarının himayədarlığı altında fəaliyyət göstərən bəzi doğma provayderlərin interneti Delta Telekom-dan deyil , ödənişsiz olara elə dövlət operatorlarından alması ilə bağlı şübhələr olub.

Hazırda  Rabitə və Yüksək Texnologiyalar Naziriliyində aparılan yoxlamalar çərçivəsində də bu problemlərin ortaya çıxdığı bildirilir və onlara qarşı  öz dövriyyələrinə uyğun  ödənişlərin edilməsi ilə bağlı tələblərin irəli sürüləcəyi gözlənilir.

Borcların ödənilməyə başlaması düşünməyə əsas verir ki, qarşıdakı müddətdə ölkədə maliyyə problemləri ilə bağlı internetdə hər hansı kəsilmələr olmayacaq. 

Məltəm Talıbzadə