RƏQƏMSAL DÜNYA

Məlumat verdiyimiz kimi, uzun müddətdir provayderlər ilə ölkənin əsas internet təchizatçısı Delta Telecom arasında ciddi problemlər yaşanır.

Xəbər verdiyimiz kimi, yerli provayderlərin Delta Telecom-a külli miqdarda borcu yaranıb. Bu səbəbdən də adı çəkilən şirkət beynəlxalq telekommunikasiya operatorları ilə ödənişləri edə bilmədiyindən ölkədə internetin kəsilməsi ehtimalı yaranıb.

Neçə müddətdir ki, Delta Telecom provayderlərə xəbərdarlıq edir ki, borclarını ödəsinlər. Hətta şirkət bir sıra provayderlərin internetini kəsmək məcburiyyətində qaldığını və məhkəməyə müraciət edəcəklərini bildirmişdi.

Qeyd etdiyimiz kimi, Delta Telecom CityNet provayderini də məhkəməyə vermişdi. Xeberler.az bu məsələ ilə bağlı araşdırmalar apararkən provayderlərin əksəriyyəti həqiqətən də borclarının olduğunu və ödəməyə çalışdıqlarını bildirmişdi.

Yerli provayderlərin Delta Telecom-a bütövlükdə 30- 40 milyona yaxın borcu olduğu bildirilir.

Məlumata görə, təkcə dörd dövlət provayderinin Delta Telecom-a 10 milyon manatadək borcu yaranıb. Yalnız Bakı Telefon Rabitəsi İstehsalat Birliyinin (Bakİnternet provayderi) Delta-ya 7-8 milyon borcu olduğu qeyd edilir.

Xeberler.az-ın əldə etdiyi məlumata görə, Delta Telecom AzQtel (SAZZ) provayderini də məhkəməyə verib.

Qeyd edək ki, bu provayderin şirkətə 3 milyon manatadək borcu olduğu bildirilir.

Məlumdur ki, istifadəçilər provayderlərdən interneti xidmətini müqavilə əsasında alırlar. Ödəniş olmadığı təqdirdə internet xidməti dərhal bağlanır. Belə olduğu halda provayderlərin milyonlarla borclarının yaranması düşündürücü məqamlardandır.

Ekspertlər, Nəqliyyat, Rabitə və Yüksək Texnologiyalar Nazirliyi (NRYTN) və digər aidiyyatı qurumlar tərəfindən bu məslənin ciddi olaraq araşıdırılmasının vacibliyini bildirsələr də, hələlik bu məsələ də öz həllini tapmayıb.

Xatırladaq ki, bir müddət öncə Delta Telecom 10 provayderi məhkəməyə verəcəyi barədə xəbərdarlıq etmişdi.

Məlumat verdiyimiz kimi, Delta Telecom  ilə provayderlər arasında olan bu probelmin ölkədə son dövrlərdə internetin keyfiyyətinin pisləşməsinə təsir edən əsas amillərdən biri olaraqqeyd edilir.Trafiki, internet sürətini artırmaq gücündə olmayan, bunu etmək istəməyən provayderlər məlum “çəkidə aldatma” yolu ilə istifadəçilərə müqavilələrdə nəzərdə tutulan sürəti vermir.

Delta Telecom da problemin provayderlərdə olduğunu iddia edir.

Xeberler.az