RƏQƏMSAL DÜNYA

Son günlərdə  məlumat vermişdik ki, yerli provayderlərin ölkənin əsas internet təchizatçısı olan Delta Telecom-a külli miqdarda borcu yaranıb. Bu səbəbdən də adı çəkilən şirkət beynəlxalq telekommunikasiya operatorları ilə ödənişləri edə bilmədiyindən ölkədə internetin kəsilməsi ehtimalı yaranıb.

Təkcə dörd dövlət provayderinin Delta Telecom-a 10 milyon manatadək borcu olduğu bildirilirdi.

Provayderlər  Delta Telecom-a borclarının olduğunu Xeberler.az-a  təsdiqləmişdi.

Əldə etdiyimiz məlumata görə, provayderlər hələ də şirkətə borclarını ödəməyib.

Məlumatımıza görə, Delta Telecom borcunu ödəməyən  provayderlərin internetini kəsməyə və onları məhkəməyə verməyə  hazırlaşır.

İlk növbədə uzun müddətdən bəri borclu olan provayderlərlə münasibətlərin məhkəmə müstəvisində həll edilməsi nəzərdə tutulur.

Şirkət borcun devalvasiyadan əvvəlki məzənnə ilə ödənişini tələb etmək niyyətindədir.

Xeberler.az bildirir ki, hazırda Bakı Telefon İstehsalat Birliyi – Bakinternet provayderi, Aztelekom (AzTelecom.net), AzEurotel , BƏHM (indiki AzİnTelecom), MHM ( AzDataCom), AzQtel (SAZZ), Qlobal Network, Smart System, Caspel,  Connect, Caspian Telekom (Ailə TV), Avritel provayderlərinin Delta  Telecom-a böyük miqardada borcu var.

Ötən  yazılarımızda məlumat vermişdik ki , “doğma provayderlər” də də internet ödənişləri ilə bağlı ciddi problemlər olub . Belə ki, əldə etdiyimiz məlumata görə, dövlət operatorlarının himayədarlığı altında fəaliyyət göstərən bəzi doğma provayderlərin interneti Delta Telekom-dan deyil , ödənişsiz olara elə dövlət operatorlarından alması ilə bağlı şübhələr olub.

Hazırda  Rabitə və Yüksək Texnologiyalar Naziriliyində aparılan yoxlamalar çərçivəsində də bu problemlərin ortaya çıxdığı bildirilir və onlara qarşı  öz dövriyyələrinə uyğun  ödənişlərin edilməsi ilə bağlı tələblərin irəli sürüləcəyi gözlənilir.
Onu da qeyd edək ki,  ötən  gün bəzi  kabel televiziya provayderləri  təqdim etdikləri internet xidmətlərinin qiymətini qaldıracaqlarını açıqlayıb.

Onsuz da kifayət qədər baha və keyfiyyətsiz olan internet xidmətlərinin qiymətlərinin artırılmasının hansı zərurətdən qaynaqladığı açıqlanmayıb.

Maraqlıdır ki, əsas internet təchizatçısı olan Delta Telecom da  provayderlərə satdığı internetin qiymətlərində hər hansı artımın olmayacağını bildirib.

Belə olan halda provayderelərin qiymət artımı ilə bağlı açıqlamaları ciddi suallar doğurur.

Mövzuya qayıdacağıq

Məltəm Talıbzadə