QANUNVERİCİLİK

Məlumat verdiyimiz kimi, Rabitə və Yüksək Texnologiyalar Nazirliyində hazırda ciddi islahatlar aparılır.

Bir müddət əvvəl də məlumat vermişdik ki, islahatlar çərçivəsində kadr dəyişiklikləri də edilir.

Belə ki, son aylarda RYTN-də Hüquq və insan resursları şöbəsinin müdiri Bəxtiyar Məmmədov, nazirliyin Məlumat Hesablama Mərkəzinin (MHM) direktoru Nail Mərdanov, nazir müşaviri Müşviq Əmirov, nazirliyin ümumi şöbəsinin müdiri İsgəndər Tağıyev də vəzifəsindən azad edilib.

Hazırda yalnız mətbuat xidmətinin rəhbəri vəzifəsində çalışan Müşviq Əmirov əvvəllər nazirliyin çoxsaylı media qurumlarına da rəhbərlik edib. 

Belə ki, yeni rəhbərlik təyin olunanadək  nazirliklə bağlı bütün məlumatlar həm qurumun rəsmi saytı mincom. gov.az üzərindən, “Rabitə dünyası” qəzeti və onun onlayn versiyası vasitəsilə,  həm də RYTN-nin  İCTnews.az elektron xəbər xidməti  vasitəsi ilə cəmiyyətə çatırılırdı. Eyni zamanda , bu qurumun daxilində olan digər strukturların RYTN-lə bağlı açıqlamalarını yayan internet resursları var.

Əvvəllər reallıq belə idi ki, rəsmi məlumatlar və press-relizlər, əksər vaxt, hətta nazirliklə bağlı vacib məlumatlar rəsmi sayt vasitəsilə deyil, ilk olaraq ictnews.az elektron xidmət vasitəsi ilə yayımlanırdı.

Son zamanlarda isə nazirliyin media qurumlarının fəaliyyətində də cididi  dəyişikliklər müşahidə olunur.

Məlumat verdiyimiz kimi, bir müddət öncə RYTN-də  islahatlar daxilində  qurumun qəzetinin artıq bağlandığı, bundan sonra öz işini jurnal kimi davam etdirəcəyi açıqlandı.

Xeberler.az-ın əldə etdiyi məlumata görə, hazırda yeni nazir bu media qurumlarına nəzarəti gücləndirib və daha bir neçə kadr dəyişiklikləri edib.

Məlumatımıza görə,  İctimai Televiziya və Radio Verilişləri Şirkətinin (İTV) ictimaiyyətlə əlaqələr və monitorinq departamentinin sabiq rəhbəri Tahir Məmmədov Müşviq Əmirovun yerinə təyin olunub.

Bildirilir ki, bundan sonra nazirliyin media resurslarına Tahir Məmmədov nəzarət edəcək. 

Əldə etdiyimiz məlumatda nazirliyin media resurslarında fəaliyyət göstərən  işçlərin də bir qisminin işdən kənarlaşdırıldığı bildirilir. Nazirliyin sonradan yaradılan media resursu, ictnews.az media qurumunun fəaliyyətini  dayandırdığı bildirilir.

Əldə etdiyimiz məlumatlar və müşahidələr göstərir ki, nazirlik hazırda rəsmi resurs olan mincom.gov.az-ın  canlandırılması və qanunvericilikdə nəzərdə tutulduğu kimi bu resurs vasitəsilə ictimai informasiyaların və rəsmi xəbərlərin açıqlanmasını gücləndirməyi qarşıya məqsəd qoyub.

Bununla əlaqədar kadr təminatının da həyata keçirildiyi, rəsmi resursun yeni redaktorun təyin edildiyi də bildirilir.

Ümumiyyətlə, zaman-zaman ekspertlər dövlət qurmumun bu qədər media resursunu saxlayıb, dövlət büdəcəsindən maliyyələşdirilməsinin düzgün olmadığını və ictimai informasiyaların ancaq rəsmi saytlar vasitəsilə yayılmasının vacibliyini diqqətə çatırırdı. Belə ki, qeyd edilirdi ki, bütün dövlət qurumları fəaliyyətləri ilə bağlı məlumatları obyektiv olaraq  rəsmi sayt üzərindən yayımlamalı və bütün media orqanlarına məlumat eyni anda çatmalıdır.

Bu baxımdan ekspertlər bir neçə media qurumu saxlamaqdansa , onların kadr potensialından və resurslarından istifadə etməklə rəsmi internet resursun fəaliyyətinin gücləndirilməsini düzgün addım kimi dəyərləndirirlər.

Ekspertlər  hesab edirdirlər ki, dövlət qurumları bu kimi media orqanlarından informasiya təbliğat maşını kimi istifadə edir və bu da  insanların obyektiv informasiya əldə etmələrini əngəlləyir.

Xeberler.az