TƏNZİMLƏMƏ

 Hazırda Rabitə və Yüksək Texnologiyalar Nazirliyinin  tərkibində bir neçə media  qurumu fəaliyyət göstərir.

Belə ki,  nazirliklə bağlı bütün məlumatlar həm qurumun rəsmi saytı mincom.az üzərindən, “Rabitə dünyası” qəzeti və onun onlayn versiyası vasitəsilə,  həm də RYTN-nin  İCTnews.az elektron xəbər xidməti  vasitəsi ilə cəmiyyətə çatırılır. Eyni zamanda , bu qurumun daxilində olan digər strukturların RYTN-lə bağlı açıqlamaları yayan internet resursları var.

Müşahidələrimiz göstərir ki, əksər vaxt hətta nazirliklə bağlı vacib məlumatlar rəsmi sayt vasitəsilə deyil ,ilk olaraq  ictnews.az elektron xidmət vasitəsi ilə yayımlanır.

Həmçinin RYTN-nin bu  günə qədər “Rabitə dünyası” qəzeti də nəşr olunurdu.  Belə ki, qəzetdə nazirliklə və ölkə İKT sektoru ilə bağlı vacib məlumatlar yer alırdı.

Son günlərdə məlumat verdiyimiz kimi, RYTN-də ciddi islahalatlar aparılır. Bu islahatlar daxilində  qurumun qəzetinin  artıq bağlandığı, bundan sonra öz işini jurnal kimi davam etdirəcəyi açıqlanıb.

Zaman-zaman ekspertlər dövlət qurmumun bu qədər media resursunu saxlayıb,  dövlət büdəcəsindən maliyyələşdirilməsinin düzgün olmadığını və ictimai infromasiyaların ancaq rəsmi saytlar vasitəsilə yayılmasının vacibliyini diqqətə çatırırdı. Belə ki, qeyd edilirdi ki, bütün dövlət qurumları fəaliyyətləri ilə bağlı məlumatları obyektiv olaraq  rəsmi sayt üzərindən yayımlamalı və bütün media orqanlarına məlumat eyni anda çatmalıdır.

Hətta  dövlət qurumları fəaliyyətləri ilə bağlı press-relizləri  də KİV-lərə ötürməlidir.

Lakin  əksər vaxt RYTN ilə bağlı məlumatları  rəsmi sayt yox,  ictnews.az elektron xəbər xidməti   vasitəsi ilə əldə edirik.  Press-reliz göndərilməsi halları ilə isə rastlaşmırıq.

Xeberler.az olaraq məsələnin hüquqi tərəfləri ilə bağlı ekspert  Ələsgər Məmmədli ilə söhbət etdik.

Media üzrə hüquq eksperti də bildirdi  ki, əslində  dövlət qurumları, o cümlədən də RYTN məlumatları rəsmi saytı üzərindən yayımlamalıdır.

O qeyd edib ki, nazirliyin hər hansı  mətbuat orqanı saxlaması, təsis etməsi əslində demokratik  dövlətlər  üçün normal hal deyil:

“ Hətta 2001-ci ildə Azərbaycan Avropa şurasına seçildikdə  üzərinə öhdəlik götürmüşdü ki, dövlətə məxsus media qurumlarından imtina edəcək. Amma bu dövrdə nəinki  onlardan imtina edildi , onların sayı sürətlə artırıldı”.

Ələsgər Məmmədli vurğulayıb ki, dövlət qurumları bu kimi media orqanlarında informasiya təbliğat maşını kimi istifadə edir və bu da  insanların obyektiv informasiya əldə etmələrini əngəlləyir.

Onun sözlərinə görə, bu kimi media orqanlarının saxlanılmasına  struktur və  kadr baxımından  yüksək miqdarda vəsait sərf edilir və bu da nazirliyin,  dövlətin büdcəsinə  ziyan vurur.

İndiki məqamda məsələnin də daha ciddi hal aldığını deyən ekspert  bu resursların bağlanması, yalnız qurmun rəsmi saytı üzərindən məlumatların paylaşılmasını zəruri hesab edir.

Media üzrə ekspert Azər Həsrət isə ümumiyyətlə dövlət qurumlarının qəzetlərini və əlavə xəbər resurslarını ləğv etməyin doğru olduğunu hesab edir.

Onun sözlərinə görə, bu kimi  əlavə resurslar saxlamağa ehtiyac  yoxdur:

“ Qanun dövlət qurumlarının internet saytlarının qurulmasını məcburi edir. Bu baxımdan RYTN-nin də saytı var və əlavə KİV-lər  saxlayıb lazımsız xərclərə səbəb  olmaq düzgün deyil.  Bu baxımdan düşünürəm ki, qəzetin ləğvi doğru addımdır. Jurnal kimi ola bilər. O da yalnız rüblük kimi,  bir az da iri həcmli analitik, statististik yazılarla çap oluna bilər. Amma davamlı xəbər mediası kimi olmasına artıq gərək yoxdur. Amma  bu qurumların işçilərini də işsiz qoymaq olmaz. Nazirlik mütləq həmin işçiləri başqa işlə təmin etməlidir”.

Məltəm Talıbzadə