İNNOVASİYA VƏ STARTAP

Məlumat verdiyimiz kimi, regionda startap ekosistemini inkişaf etirmək üçün Gürcüstanda 3 günlük Traction Camp seminarı keçirilib.

Xeberler.az-ın məlumatına görə, Gürcüstan və Ermənistandan seçilmiş startaplar arasında Azərbaycandan 6 startapımız  təmsil olunub.

Belə ki, Azərbaycandan Xercim.az-ikeebon layihəsinin rəhbəri Orxan Əhmədov,  Flapus layihəsinin rəhbəri Murad Ələkbərov, Vizam.az-ın təsisçisi Baba Ağayev, Custom Ar layihəsinin  rəhbəri  Fərid Yusifoğlu, Lendock – Ağahüseyn Əhmədov , MuzicBeez –in təsisçisi Elin Məlikzadə  iştirak edib.

Flapus layihəsinin rəhbəri Murad Ələkbərov Traction Camp ilə bağlı təəssüratlarını  Xeberler.az-la bölüşüb.

Startapçımız deyib ki, 3 günlük təlim çərçivəsində layihə rəhbərləri bu sahədə fəaliyyətləri üçün fərqli təcrübə toplayıblar.

Onun sözlərinə görə, təlimdə beynəlxalq ekspert-mentorlar onlara startaplarla bağlı bir neçə istiqamətdə məlumatlar veriblər:

“Seminarda layihələrin təqdim edilməsi yolları tədris edildi. Yəni, ekspertlər startap layihəsini daha effektiv təqdim etmək barədə danışdılar, konkret olaraq hansı məsələlərə diqqət yetirməyi  göstərdilər”.

Murad Ələkbərov  deyib ki, təlim çərçivəsində startapların konsepsiyası, marketinq , istifadəçiyə uyğun interfeys ilə bağlı da müzakirələr olub:

“Təcrübəli mentorlardan dünyadakı hazırki trendlərin hara getməsi, elektron məhsullarda istifadəçilərin zövqlərinin dəyişməsi və o zövqlərə uyğunlaşması barədə məlumatlar çox maraqlı oldu”.

O qeyd edib ki, 3 gün ərzində intensiv təlimlər və mentorluq keçirilib.

Murad Ələkbərov  Xeberler.az-a təşəbbüskar  təlim  müddətində startapların qeydiyyatı, layihələrə investisiya cəlb olunması və maliyyə  mövzularına da toxunulduğunu deyib.

Təlim USAİD – REG, CCC Startup,  Xəzər Vençur (Khazar Ventures ) və digər regional təşkilatlar tərəfindən təşkil olunub.

Məltəm Talıbzadə