İNNOVASİYA VƏ STARTAP

Azərbaycanlı startapçılar informasiya əldə edilməsi prosesini asanlaşdıran yeni sistem yaradıblar.

Xeberler.az-ın məlumatına görə, Mobchannel adlanan layihənin əsas üstünlüyü insanların vaxtına qənaət etməsi və lazımı informasiyanı axtarış etmədən izləyə bilməsidir.

Platformanın məhz 22 iyul – Milli Mətbuat günündə təqdim edilməsi  isə təsadüfi olmayıb.

Layihənin rəhbəri Vaqif Abbasov Xeberler.az-a bildirib bildirib ki, Mobchannel əksər yerli və xarici mətbuatı bir mənbədə toplayan sistemdir: “Artıq insanlar onlara maraqlı olan bütün növ məlumatları vahid platformadan izləyə bilərlər”.

Vaqif Abbasov qeyd edib ki, 2014-cü ildə apardıqları  “İnsanlar İnternetdən nə üçün istifadə edir?” adlı araşdırmada  maraqlı məqamla qarşılaşıblar. Belə ki, araşdırma zamanı məlum ki,  İnternet istifadəçiləri uzun zaman sərf  İnternetdə axtarış etmələrinə baxmayaraq doğru informasiyanı əldə etməyə çətinlik çəkirlər.   Mobchannel platforması isə bu istiqamətdə istifadəçilərə kömək məqsədilə yadılıb.

Vaqif Abbasov deyib ki, Mobchannel insanlara lazım olan məlumatları axtarış etmədən əldə etməyə kömək edən platformadır. İstifadəçi sistemdə təyin olunmuş 15 kanal üzrə (xəbər, maraqlı, kino, tədbirlər, səyahət, vakansiya, alış-veriş, əmlak alqı-satqısı, avtomobil alqı-satqısı) istədiyini seçib, profil məlumatlarını daxil edir. Bununla o axtardığı məlumatların avtomatlaşdırılmış şəkildə əldə olunmasını təmin edir və lazımı məlumat olduğu təqdirdə bildiriş funksiyası ilə ani xəbərdar olmuş olur:

“İnternet inkişaf etdikcə veb-saytların sayı sürətlə artmaqdadır. Netcraft-ın məlumatına görə,  2013-cü ilin iyun ayında 673 milyon olan veb səhifələrin sayı 2014-cü ildə 969 milyona yüksəlib. Bir il ərzində 300 milyona yaxın yeni veb sayt açılıb. Zaman keçdikcə bu rəqəmlər daha da artacaq və biz lazım olan informasiyanı əldə etməyə çətinlik çəkəcəyik və ya lazımı informasiyanı əldə etməyə böyük zaman sərf edəcəyik”.

Layihə rəhbərinin sözlərinə görə, Mobchannel platformasında istifadəçi 15 kanaldan istədiyini seçərək öz profilini yaradır, həmin kanallar üzrə məlumatları əldə etməyə başlayır:

“İstifadəçi profilinə uyğun yeni məlumatlar olduğu zaman bildirişlər alaraq dərhal xəbərdar olur. Məsələn, istifadəçi vakaansiya kanalında axtardığı işə uyğun olaraq filterləri (məkan, maaş, işin növü) seçir. Bu zaman həmin filterlərə uyğun iş elanları varsa istifadəçiyə təqdim olunur və ya yeni iş elanları olduğu zaman istifadəçiyə bildirişlər gəlir. İstifadəçi bunun kimi digər 14 kanalda da profilini yaradaraq ona lazım olan məlumatları axtarış etmədən əldə edə bilər.

Hazırda proqram android əməliyyat sistemli telefonlar üçün mövcuddur. 

Məltəm Talıbzadə