TƏDBİRLƏR

Məlumat verdiyimiz kimi, Azərbaycanda proqramçılar arasında növbəti dəfə yarış keçiriləcək.

Xeberler.az-ın məlumatına görə, Azercell  və PAŞA Bank-ın dəstəyi, Barama İnnovasiya və Sahibkarlıq Mərkəzi-nin və WoWoman platformasının təşkilatçılığı ilə gənc proqramçılar üçün təlim və yarış xarakterli TechFall 2016 Hackathon layihəsinə başlanılır.

Hachathon- proqramçıların birləşərək müxtəlif problemləri həll etdikləri, layihələr hazırladıqları və yarışdıqları tədbirlər silsiləsidir. 

Hackathon-da proqramçılar müəyyən olunmuş vaxt ərzində proqramlaşdırma sahəsində öz məharətlərini göstərirlər.

Hackhaton-lar mütəmadi olaraq dünyanın bir çox yerində, adətən Google, Netflix, Facebook, HP və Microsoft  kimi nəhəng şirkətlər tərəfindən həyata keçirilir.

TechFall 2016 Hackathon layihəsində də developerlər  36 saat ərzində yatmadan fasiləsiz yeni mobil tətbiqetmə hazırlayıb münsiflər heyətinə təqdim etməlidir.

Bu layihədə yaşı 18-dən yuxarı 3 nəfərdən ibarət komanda şəkilində hər kəs iştirak edə bilər.  Layihədə iştirak etmək istəyənlər 31 oktyabr tarixinə qədər buradan  qeydiyyatdan keçməlidir. Seçimlərdən sonra 15 komanda layihədə öz işini davam etdirmək şansı qazanır.

5-6 noyabr tarixlərində keçiriləcək final mərhələsində isə komandalar püşkatma vasitəsilə mövzu seçib, həmin mövzu üzərində 36 saat ərzində tətbiq hazırlayacaqlar. Təqdim olunan tətbiq ilk öncə texniki münsiflər heyəti tərəfindən qiymətləndiriləcək. 9 noyabr tarixində keçiriləcək təqdimat mərasimində isə komandalar öz tətbiqlərini peşəkar münsiflər qarşısında təqdim edəcək.

TechFall 2016 Hackathon yarışmasında ilk yerin qalibinə Azercell və PAŞA Bank-dan dəyərli hədiyyələr, 2-ci yerin sahiblərinə Step IT akademiyasından IT kurslarda 1 aylıq iştirak kuponu, 3-cü yerin sahibinə isə  Barama İnnovasiya və Sahibkarlıq mərkəzi tərəfindən dəyərli hədiyyələr təqdim ediləcək.

Onu da bildirək ki, layihə çərçivəsində komandaların qida təlabatı Özsut restoranlar şəbəkəsi tərəfindən ödəniləcək. Tədbirin Media dəstəyi  isə technote.az tərəfindən təmin ediləcək.

Qeyd edək ki,TechFall 2016 Hackathon layihəsinin əsas məqsədi ölkəmizdə informasiya texnologiyaları sahəsinə olan marağı artırmaq və bu sahədə olan istedadlı insanların bacarıqlarını göstərməsinə şərait yaratmaqdır. Bununla yanaşı keçirildiyi müddət ərzində müxtəlif proqramların və alətlərin yaradılması, bununla da proqramçıların öz aralarında rəqabət şəraitində biliklərini yoxlama və yeni biliklər qazanmalarına şərait yaratmaq da layihənin əsas məqsədlərindəndir.

Məltəm Talıbzadə