TƏDBİRLƏR

ADA Universiteti Fondu (ADAF) və Fondun daimi tərəfdaşlarından olan “Azercell” şirkətinin birgə təşkilatçılığı ilə “TechFront: Texnologiyanın sərhədlərini kəşf et” mövzusunda akademiya-sənaye görüşü keçirilib.

Xeberler.az bildirir ki, bu barədə universitetdən məlumat verilib.

Universitetin İnformasiya texnologiyaları və mühəndislik fakültəsinin akademik dəstəyi ilə baş tutan tədbirin məqsədi süni intellekt, proqram mühəndisliyi və kibertəhlükəsizlik kimi mühüm texnologiya sahələrindəki yenilikləri və perspektivləri müzakirə etmək, eləcə də gənc startaplara və texnologiya mütəxəssislərinə bilik və şəbəkələşmə imkanları yaratmaq olub.

Tədbirin açılışında Corc Vaşinqton Universitetindən Stefan Keysler, ADA Universitetinin professoru Cəmaləddin Həsənov və “PAŞA Holding”in mütəxəssisi Rağib İskəndərli çıxış edib, texnologiyanın inkişaf istiqamətləri, akademiyanın rolu və sənaye əməkdaşlığının əhəmiyyətinə toxunublar.

İştirakçılar süni intellektin sürətli inkişafı, kibertəhlükəsizlikdə risklərin artması və proqram mühəndisliyində yeni tendensiyalarla bağlı ekspertlərin təqdimatlarını dinləyiblər.

Daha sonra panel müzakirələrinə start verilib. ADA Universitetinin müəllimi Samir Məmmədovun moderatorluğu ilə keçirilən “Gələcəyə baxış: Bizi nə gözləyir?” mövzusundakı ilk paneldə “Azercell” və “Unibank” nümayəndələri süni intellektin sosial və iqtisadi təsirləri, etik tərəfləri və tətbiq sahələrini müzakirə ediblər.

“PAŞA Bank”ın mütəxəssisi Müşviq Quluzadənin moderatorluğu ilə keçirilən və Proqram mühəndisliyinə həsr olunmuş ikinci paneldə isə ADA Universiteti, “BirBank” və Rəqəmsal İnkişaf Agentliyinin nümayəndələri “Gələcəyin qurulması: Bunu necə reallaşdıracağıq?” sualı ətrafında proqram təminatı arxitekturası, məhsulyönümlü yanaşma və texnoloji liderlik mövzularına toxunublar.

ADA Universitetinin müəllimi Rəşad Əliyevin moderatorluğu ilə keçirilən Kibertəhlükəsizlik panelində “Code Academy”, “Azercell” və müvafiq dövlət qurumlarının ekspertləri “Risklər və təhlükəsizlik tədbirləri: Gələcəyi necə qoruyaq?” mövzusunda müzakirələr aparıblar. Paneldə rəqəmsal təhlükəsizlik mədəniyyəti, informasiya sistemlərinin davamlılığı və qabaqlayıcı tədbirlər ön plana çəkilib.

Forum çərçivəsində iştirakçılara şəbəkə imkanları da təqdim olunub. ADA Universitetinin tələbə startap komandaları öz layihələrini nümayiş etdiriblər və iştirakçılarla interaktiv təqdimat və fikir mübadiləsi aparıblar.

Tədbirin sonunda “Ən Yaxşı Startap” və panellər üzrə “Ən Yaxşı Sual” nominasiyaları üzrə qaliblər mükafatlandırılıb.