MOBİL RABİTƏ

Məlumat verdiyimiz kimi, TeliaSonera beynəlxalq telekommunikasiya şirkəti Azərbaycanda və digər Avrasiya ölkələrində iştirakını azaldacağını bildirib.

Xeberler.az şirkətin yaydığı məlumata istinadən bildirir ki,  qarşıdakı illərdə şirkət yeni strategiyası çərçivəsində diqqətini Avropa, xüsusilə də İsveçdə fəaliyyətə ayıracaq və Avrasiya regionunda, o cümlədən Nepal, Qazaxıstan, Özbəkistan, Azərbaycan, Gürcüstan, Moldova və Tacikistanda iştirakını azaldacaq.

TeliaSonera kimi qlobal şirkətin Azərbaycan bazarında fəaliyyətini azaltması ilə bağlı açıqlaması ekspertlərin diqqətini cəlb edib.  
Azərbaycan İnternet Forumunun rəhbəri Osman Gündüz Xeberler.az-a şirkətin bu qərarını şərh edərkən  bildirib  ki, bu kifayət qədər ciddi məsələdir:

“Öncə dəqiqləşdirmək lazımdır ki, Azercell şirkətində payı olan bu qlobal qurum həqiqətən belə bir rəsmi qərar veribmi və burada hansı strategiya əsas götürülüb?  Əgər şirkətdən belə bir rəsmi açıqlama verilibsə, bu doğurdan da  ciddi siqnaldır. Fikrimcə Azercell şirkətinin daxil olduğu ciddi bir beynəlxalq şirkətin bazardan getməsi ilə bağlı açıqlaması  hökumətin və cəmiyyətin reaksiya verəcəyi bir məsələdir“

Osman Gündüz xatırladıb ki, dünya brendi TeliaSoneranın da payı olan   Azercell şirkəti təkcə ötən illər ərzində  Azərbaycanda texnologiyalar sahəsinə 1 milyard manat sərmayə yatırıb.
Ekspert hesab edir ki, Azercell  Azərbaycanda nəinki mobil bazarda,  ümumiyyətlə İKT-nin, innovasiyaların inkişafında mühüm rolu olan böyük qurumlarından biridir:

“Fikrimcə belə bir dünya brendinin payçı olaraq Azərbaycan bazarında fəaliyyətini azaltması  Azərbaycan üçün heç də  arzuolunan deyil və  düşündürcü haldır”.

Osman Gündüz şirkətin bu addımı atmasının iki əsas səbəbi ola biləcəyini də güman edir:

“Məlumdur ki, bu gün dünya mobil biznes bazarında elə də xoşagələn vəziyyət yoxdur. İnternet, sosial media bütün dünyada mobil operatorlar üçün bu bazarı xeyli daraldıb.Danışıq funkisyasını həyata keçirən yeni  mobil tətbiqlər yaranır
( WhatsApp, Viber, Skype və s.)  və bu da mobil bazarda  gəlirləri xeyli azaldır. Mobil telefonlarla klassik formada danışıq getdikcə azalır. Hazırda mobil operatorlar daha çox İnternet bazarına istiqamətlənirlər. Azərbaycan da bu qurumlar üçün  elə də böyük İnternet bazarı deyil. Ola bilər ki yeni investisiyalar yatırılması baxımından və gözlənilən gəlirlər baxımından, yəni biznes baxımından Azərbaycanın mobil İnternet bazarı maraqlı olmaya da bilər ”.

Ekspertin sözlərinə görə, digər tərəfdən də  Azərbayacanda son dövrlər yaranmış yeni qanunvericilik mühiti də şirkətin bu addım atmasını şərtləndirən səbəb ola bilər.

Osman Gündüz bir neçə ay bundan öncə ölkədə lisenziyalaşdırılan fəaliyyət növləri ilə bağlı qanunvericilikdə dəyişikliklər edildiyini də diqqətə çatdırıb.

 “Yeni dəyişikliklər mobil operatorlarla  lisenziya verən dövlət orqanı arasında texnoloji standartlar, texniki göstəricilər, keyfiyyətli xidmət üçün əsas şərtlər və s  göstərilməklə  yeni lisenziya müqaviləsi imzalanmasını nəzərdə tutur. Ola bilər ki, bu şərtlər də şirkətin maraqlarna uyğun gəlməyib və belə bir açıqlama üçün əsas yaradıb.”

Osman Gündüz Xeberler.az -a bildirib ki, istənilən halda TeliaSonera –nın Azərbaycan bazarından getməsi ölkənin mobil bazarına, o cümlədən də  Azercell-ə təsirsiz ötüşməyəcək.

Hazırda Azercell-in bütün səhmləri Türkiyənin "Azertel Telekomünikasyon Yatırım Dış Ticaret A.Ş." şirkətinə məxsusdur. Bu şirkət "Fintur Holdings B.V."-in tərkibinə daxildir. TeliaSonera- ya məxsus olan "Fintur Holdings B.V." şirkətinin  Azercell şirkətində iştirak payı var.

Xeberler.az mövzunu diqqətdə saxlayacaq

Ruhi Muradova