TƏHLÜKƏSİZLİK

Azyaşlıların internetin zərərli təsirlərindən qorunması, onların təhlükəsizliyinin təmin olunması mühüm əhəmiyyət kəsb edən məsələlərdəndir.

AMEA İnformasiya Texnologiyaları İnstitutunda keçirilən elmi seminarlardan biri də məhz bu məsələyə həsr olunub.

Xeberler.az-a AMEA-dan verilən məlumata görə, institutun əməkdaşı Nəzakət Məlikova “Uşaqların internet mühitində təhlükəsizliyinin təmin olunması problemləri və onların həlli yolları” adlı məruzə ilə seminarda çıxış edib. Nəzakət Məlikova uşaqların internetdə qarşılaşdığı təhlükələr, kompüter oyunlarının uşaq və yeniyetmələrin psixologiyasına təsiri haqqında danışıb.

Nəzakət Məlikova bildirib ki, bu sahədə ən böyük məsuliyyət valideynlər, internet provayderləri, təhsil qurumları və dövlətin üzərinə düşür. Uşaqların zərərli kontentdən qorunması üçün provayderlər tərəfindən təklif olunan “informasiyanın süzgəcdən keçirilməsi” xidmətindən istifadə olunmasının vacibliyini vurğulayıb.

Dünyada internet istifadəçilərinin ümumi sayının 56 milyon, azyaşlıların sayının 10 milyon təşkil etdiyini bildirən Nəzakət Məlikova ölkəmizdə internet istifadəçilərinin sayının gənc və yeniyetmələrin hesabına sürətlə artdığını dilə gətirib.

O, həmçinin, bildirib ki, internet mühitində rast gəlinən kibertəhlükələrdən danışaraq bu təhlükələrin kontent, kommunikasiya, elektron, istehlakçı kimi risk qruplarına ayrıldığını söyləyib.

Nəzakət Məlikova internetin məktəblilər üçün yaratdığı təhlükələri diqqətə çatdırıb. Həmçinin, internetdən asılılıq problemi və onun fəsadları, bu problemlərlə mübarizə üçün beynəlxalq təcrübə, Azərbaycanda uşaqların internet-asılılıqdan qorunması istiqamətində görülən işlər barədə ətraflı məlumat verib.

Sevinc Çəltikova