TƏDBİRLƏR

Azərbaycanla yanaşı, dünyada texnologiya sahəsində baş verən yenilikləri öz oxucularına catdıran Xeberler.az bu dəfə Böyük Britaniyanın əsas şəhəri olan Londonda keçirilən BETT-2016 beynəlxalq sərgisini ziyarət edib.

Qeyd edək ki,  BETT – orta təhsildə texnologiyaların tətbiqi mövzusunda dünyanın ən mötəbər sərgilərindən biridir.

Sərgini hər il orta hesabla 35 min təhsillə bağlı olan mütəxəssislər, idarəçilər, məmurlar ziyarət edir. Sərgi ilk öncə b2b və b2g formatda işləyir və texnologiyaları adi insanlara deyil, bu texnologiyaları uşaq baxçalarında, məktəblərdə, universitetlərdə tətbiq edənlərə ünvanlanır.

Bu ilki sərginin əsas trendlərini nəzərinizə çatdırırıq.

Əlbəttə ki, əsas texnologiyalar sırasında interaktiv löhvələrdir. Bu texnologiya artıq son 2-3 ildə BETT sərgisində aparıcı olsa da, bu dəfə həmin texnologiyaları təqdim edən şirkətlərin sayı bir qədər azalıb. Yəqin ki, öz bazarlarını tutan şirkətlər artıq sərgidə iştirak etmək istəmir.

Bu ilin ən maraqlı trendi məktəblərdə ödəmə sistemləridir. Bu texnologiya ilə sərgidə təxminən 10-15 şirkət iştirak edirdi və onun əsas xüsusiyyəti pulsuz ödəmə sisteminin olmasıdır. Yəni elektron ödəmə kartları adi bank kartı kimi deyil, sadə desək Pay Pal-a oxşar bir sistem kimi işləyir. Bəziləri hətta pulu hətta xallarla (points) da əvəz etməyi təklif edir. Belə yanaşma məktəblərdə pul ödəməsinin aradan qaldırılmasına və daha da sadələşməsinə kömək etməyə yönəlib.

Əvvəlki illərlə yanaşı bu il Böyük Britaniyanın orta məktəb buraxılış imtahanlarına hazırlıq sisteminin məsafədən təhsil texnologiyası vasitəsilə tədrisinin təşkili üzrə şirkətlərin olması da nəzərə çarpır. Maraqlıdır ki, iri şirkətlərlə yanaşı sərgidə bu mövzu ilə başlı startaplar da iştirak edirdi. Lakin doğrudan da böyük maraq doğuran bir platforma görmədik. Standart və artıq bizim üçün adi olan texnologiyalar idi.

BETT sərgisi ənənəvi olaraq iri korporasiyaların təhsildə imiclərinin dəstəyi üzrə platformadır. Microsoft, Google, Intel kimi nəhənglər sərgi çərçivəsində müxtəlif seminarlar, təqdimatlar keçirirdi. Əsas məqsəd də məhz onların texnologiyasının təhsil üçün son dərəcə effektiv olmasını qeyd etməkdir.

Maraqlı trendlərdən biri də tablet/planşet vasitəsilə tədrisin təşkili üzrə həllərin təqdimatı idi. Bu istiqamətdə bir neçə şirkət çıxış edirdi. Qeyd etmək lazımdır ki, smartfonun təhsildə istifadəsi deyəsən hələ də sual altındadır. Hələlik əsas diqqət planşetlərədir.

Məktəb səviyyəsində proqramlaşdırmanı öyrədən müxtəlif şirkətlər də BETT-də təqdim olunub. Hətta sərgi çərçivəsində master-klasslar yaxud da yarışmalar keçirilirdi. Görünür, proqramlaşdırma tədricən orta məktəbə meyl edir və 17-18 yaşlı gənclər yaxın illərdə proqramlaşdırma səviyyəsinə görə indiki 22-23 yaşlılara bərabər olacaq. Azərbaycanda isə biz hələ  bu istiqamətdə bir nəzərə çarpan iş  yoxdur.

Sonda BETT sərgisində müxtəlif ölkələrin milli stendlərinin olmasını da qeyd etmək istərdik.

Cənubi Koreya, Rusiya, İspaniya, Norvegiya, Danimarka, BƏƏ və s. ölkələr sərgidə öz milli stendləri ilə çıxış edərək təhsildə texnologiya təqdim edən şirkətlərinə iştirak üçün şərait yaradıblar. Əlbəttə, biz də yaxın illərdə Azərbaycanı bu sərgidə görmək istərdik. Amma təəssüflər ki, qlobal dünya üçün maraqlı olan təhsil üçün texnologiyamız yoxdur.

Ümidlərimizi itirməyək!

 Günel