PROQRAMLAR

Elm və Təhsil Nazirliyi İdarəetmə Sistemləri İnstitutunda (İSİ) keçirilən “Kibernetika və İnformatikanın Problemləri” mövzusunda 6-cı beynəlxalq konfrans (PCI 2025) öz işini yekunlaşdırıb.

Xeberler.az məlumat verir ki, bağlanış mərasimində İSİ-nin baş direktoru akademik Əli Abbasov çıxış edərək konfransa Türkiyə, Yaponiya, Qazaxıstan, Avstriya, Özbəkistan, Ukrayna, Rusiya, Qırğızıstan, ABŞ, Belarus, Slovakiya, Çin, Gürcüstan, Bolqarıstan, Monteneqro, Yunanıstan, Macarıstan, Estoniya, Avstraliya, Latviya, Böyük Britaniya, Fransa, Moldova, Belçika, Polşa, Kanada, Yaponiya, İsveç və digər ölkələrin alim və tədqiqatçıları tərəfindən ümumilikdə 240 məruzə təqdim edildiyini, onlardan 140 məruzənin qəbul olunduğunu bildirib. Təqdim olunan tədqiqatların informasiya texnologiyalarının inkişafı fonunda xüsusi diqqətəlayiq olduğunu bildirən akademik seçilmiş məruzələrin “IEEE Xplore” elektron kitabxanasına daxil edilməsinin nəzərdə tutulduğunu vurğulayıb.

Konfransın işini yüksək qiymətləndirən alim qeyd edib ki, məruzələrdə optimallaşdırma və optimal idarəetmə, riyazi modelləşdirmə, parametrik identifikasiya və tərs məsələlər, texniki və sosial-iqtisadi sistemlərdə qərarların qəbulu, intellektual sistemlər və qərarların qəbulu və digər istiqamətlərdə fundamental tədqiqat nəticələri təqdim olunub, mövcud problemlərin aradan qaldırılması istiqamətində maraqlı fikirlər səsləndirilib.

Sonra ABŞ-ın Ueyn Dövlət Universitetinin professoru Boris Morduxoviç, AMEA-nın müxbir üzvü, professor Kamil Ayda-zadə, Türkiyənin İstanbul Texniki Universitetinin professoru Çingiz Hacıyev, İSİ-nin icraçı direktoru vəzifəsini müvəqqəti icra edən dosent Elxan Səbziyev, Qazaxıstanın İnformasiya və Hesablama Texnologiyaları İnstitutunun professoru Orken Mamırbayev, Macarıstanın Budapeşt Korvinus Universitetinin professoru Yurii Nesterov və İSİ-nin elmi işçisi Rüstəm Əzimov çıxış ediblər. Çıxışlarda kibernetika və informatikanın aktual problemlərini və perspektivlərini nəzərdən keçirmək üçün müvafiq sahə üzrə dünyanın müxtəlif ölkələrindən alim və mütəxəssisləri bir araya gətirən konfransın əhəmiyyəti qeyd olunub, qarşıda duran hədəflər diqqətə çatdırılıb.

Sonda konfrans iştirakçılarına sertifikatlar təqdim olunub.