RƏQƏMSAL DÜNYA

Azərbaycanda dövlət qurumlarında “rəqəmsal müavinlər” modelinin formalaşmağa başladığı müşahidə olunur.

Xeberler.az bildirir ki, bu barədə Azərbaycan İnternet Forumunun prezidenti Osman Gündüz sosial media hesabında paylaşım edib.

Ekspert qeyd edib ki, artıq bir sıra dövlət qurumlarında rəqəmsallaşma və süni intellekt istiqamətlərinə cavabdeh olacaq rəhbər şəxslərin müəyyənləşdirilməsi prosesi başlayıb. Onun sözlərinə görə, hökumət və Rəqəmsal İnkişaf Şurası bu istiqamətdə iki əsas yanaşma üzərində işləyir.

Birinci yanaşma çərçivəsində bəzi nazirlik və agentliklərdə yeni müavin və ya rəhbər şəxslər təyin olunur. Osman Gündüz bildirib ki, son aylarda artıq üç mərkəzi qurumda bu istiqamətdə addımlar atılıb. Belə ki, TƏBİB-də Rahim Hüseynov icraçı direktorun müavini, Rəqəmsal İnkişaf və Nəqliyyat Nazirliyi-də Rəşad Həsənov nazir müavini, Ekologiya və Təbii Sərvətlər Nazirliyində isə Ağakərim Səmədzadə birinci müavin təyin olunub. Ekspert hesab edir ki, həmin şəxslər rəqəmsal transformasiya və AI istiqamətlərinə cavabdeh olacaqlar.

İkinci yanaşmaya əsasən isə nazirlik və agentliklərin mövcud rəhbər heyətindən bir nəfərin “rəqəmsal transformasiya üzrə məsul şəxs” kimi müəyyənləşdirilməsi nəzərdə tutulur. Bu halda məsuliyyət birbaşa qurumların öz üzərində qalacaq.

Osman Gündüz bu prosesdə müəyyən risklərin də olduğunu vurğulayıb. O bildirib ki, innovasiya və rəqəmsal sahədə baxışı olmayan şəxslərin formal şəkildə məsul təyin edilməsi problemlərə səbəb ola bilər. Onun sözlərinə görə, bu şəxslərin fəaliyyəti mərkəzləşdirilmiş qaydada Rəqəmsal İnkişaf və Nəqliyyat Nazirliyi tərəfindən koordinasiya olunacaq.

Ekspert hesab edir ki, yekun institusional çərçivəni yeni yaradılmış Rəqəmsal İnkişaf Şurası müəyyən edəcək. O qeyd edib ki, Şuranın fəaliyyətinə dair hələlik geniş rəsmi açıqlamalar verilməyib və yaxın vaxtlarda ilk iclasın keçiriləcəyi gözlənilir.

Paylaşımda xatırladılıb ki, cari ilin əvvəlində Prezidentin sərəncamı ilə dövlət siyasətinin vahid və əlaqələndirilmiş şəkildə həyata keçirilməsi məqsədilə Rəqəmsal İnkişaf Şurası yaradılıb və “Rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı” təsdiqlənib. Şuranın sədri Birinci vitse-prezident Mehriban Əliyevadır.

Osman Gündüz bildirib ki, rəqəmsal biznes sektoru, transformasiya sahəsində çalışanlar və süni intellekt layihələri hazırlayanlar Şuranın ilk toplantısını səbirsizliklə gözləyirlər. Onun sözlərinə görə, rəqəmsal sektorun inkişafına ayrılacaq maliyyənin idarə olunması məsələsi də hələlik açıq qalır.

Ekspert əlavə edib ki, hazırda sektorda müəyyən gərginlik müşahidə olunur, iri tenderlər azalıb və bazarda qeyri-müəyyənlik yaranıb. O hesab edir ki, Şuranın qərarlarından sonra dövlət qurumlarının rəqəmsal layihələrinin maliyyələşməsi daha aktiv mərhələyə keçə bilər.

Bununla yanaşı, Osman Gündüz ifrat mərkəzləşmənin və əlavə bürokratik mərhələlərin innovasiyaların inkişafını ləngidə biləcəyini də vurğulayıb. Onun fikrincə, rəqəmsal transformasiya sahəsində çeviklik, sürətli qərarvermə və təşəbbüskarlıq əsas şərtlərdən biridir.