Azərbaycan Respublikasının Nazirlər Kabineti “Elektron icra” informasiya sistemi ilə bağlı yeni dəyişiklikləri təsdiqləyib.
Xeberler.az bildirir ki, qərar “Azərbaycan Respublikasının Mülki Prosessual Məcəlləsində və “İcra haqqında” qanunda dəyişiklik edilməsi barədə” qanunun tətbiqinin təmin olunması məqsədilə qəbul edilib.
Dəyişikliklərə əsasən, “Elektron icra informasiya sistemi haqqında Əsasnamə”nin bir sıra müddəaları yenilənib və sistemin funksionallığı genişləndirilib.
Yeni qaydalara əsasən:
- informasiya sistemləri olmayan dövlət qurumları və bələdiyyələr üçün elektron kabinetlər yaradılacaq və icra sənədləri həmin kabinetlər vasitəsilə qəbul ediləcək;
- icra hərəkətləri ilə bağlı bildirişlər borcluların mobil nömrələrinə SMS vasitəsilə göndəriləcək;
- icra sənədləri üzrə borcluların banklar, kredit və elektron pul təşkilatlarındakı vəsaitlərinə yönəldilən qərarların elektron ötürülməsi təmin olunacaq.
Bundan başqa, bank və elektron pul təşkilatları tərəfindən həmin qərarların icrası və nəticələri barədə məlumatların sistem üzərindən təqdim edilməsi də nəzərdə tutulur.
Qərarda həmçinin borclu fiziki şəxslərin və borclu hüquqi şəxslərin icra orqanı rəhbərlərinin ölkədən çıxış hüququnun müvəqqəti məhdudlaşdırılması ilə bağlı məhkəmə qərardadlarının da sistemə inteqrasiya olunması əksini tapıb.
Yeni dəyişikliklər çərçivəsində informasiya ehtiyatları və sistemləri olmayan dövlət qurumları və bələdiyyələr icra sənədlərini elektron kabinetlər vasitəsilə icraya yönəldə biləcəklər.
Qərarın əsas məqsədi icra proseslərinin rəqəmsallaşdırılması, dövlət qurumları arasında məlumat mübadiləsinin sürətləndirilməsi və icra mexanizmlərinin daha operativ və şəffaf şəkildə həyata keçirilməsini təmin etməkdir.
