Elektron viza məsələsində problemlər var

14-07-2015 / 12:00

Prezident İlham Əliyev ötən gün Nazirlər Kabinetinin 2015-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında elektron viza məsələsinə də toxunub.

İlham Əliyev vurğulayıb ki, Bakıya gəlmək istəyən hər bir şəxsin elektron viza almaq imkanı olmalı, bunun üçün səfirliyə, heç bir yerə getməməli, evində kompüterdə bileti, vizanı almalı, turizm şirkətlərinin xətti ilə gəlməlidir.

Xeberler.az-ın məlumatına görə, Prezident elektron viza ilə bağlı Xarici İşlər Nazirliyinə, Mədəniyyət və Turizm Nazirliyinə və digər qurumlara göstərişlər verib:

"Elektron viza məsələsi ilə bağlı dəfələrlə göstərişlər vermişəm. İndi müəyyən addımlar atılıb, amma bu məsələ hələ ki, tam şəkildə yoluna düşməyib. Əlbəttə, viza rejimi elə olmalıdır ki, Azərbaycana bəd niyyətlə gəlmək istəyənin qabağında böyük, möhkəm bir sədd olsun. Bu birmənalıdır. Eyni zamanda bu, turist, qonaq kimi gəlmək istəyənin qarşısında da maneəyə çevrilməməlidir. Ona görə vizaların elektron verilməsi, xaricdə səfirliklərə müraciət edilməməsi, bütün bu məsələlər öz həllini tapmalıdır, vəssalam. Xarici İşlər Nazirliyinə, Mədəniyyət və Turizm Nazirliyinə və digər qurumlara göstərişlər verilib, amma nəticə hanı? Yoxdur və əgər kimsə mənə desə ki, var, yoxdur, çünki mən soruşuram. Buraya gələn qonaqlar ağızdolusu danışırlar ki, nə gözəl ölkədir. Amma bir problem var ki, gəlmək çətindir, gərək bir ay, iki ay qabaq planlaşdıraq. İndi müasir dünyada insanlar sürətlə hərəkət edirlər. Gəlmək istəyən turist iki-üç gün ərzində otel sifariş edir, bilet, viza alır, gəlir, vəssalam. Bax, bu məsələni gərək biz mütləq həll edək".

Xatırladaq ki,  elektron vizanın verilməsi ilə bağlı Prezident İlham Əliyev “Azərbaycan Respublikasına gələn əcnəbilər və vətəndaşlığı olmayan şəxslərə viza rəsmiləşdirilməsi sahəsində təxirəsalınmaz tədbirlər haqqında”  20 noyabr 2012-ci il tarixdə  və "Vizaların verilməsi işinin təkmilləşdirilməsi sahəsində əlavə tədbirlər haqqında 20 noyabr 2014-cü il tarixdə sərəncamlar imzalayıb.

 Mirvari Nəcəf


ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə