TƏDBİRLƏR

İyunun 8-də Azərbaycan Hava Yolları QSC və ABAD publik hüquqi şəxsin əməkdaşlığı çərçivəsində  Heydər Əliyev Beynəlxalq Hava Limanının Duty Free zonasında milli əl işlərinin təqdim olunduğu ABAD sənətkarlıq mərkəzi fəaliyyətə başlayıb.

Beynəlxalq Hava Limanının Duty Free zonasında fəaliyyət göstərən ABAD sənətkarlıq mərkəzi sayca ikincidir. Birinci belə mərkəz İçərişəhər Dövlət Tarix-Memarlıq Qoruğu ərazisində yaradılıb və mart ayının 18-də fəaliyyətə başlayıb.

Xeberler.az-ın məlumatına görə, Azərbaycana səyahət edən turistlərin ABAD tərəfindən təqdim olunan dekorativ-tətbiqi xalq sənətkarlığı nümunələrinə olan yüksək marağı nəzərə alaraq, növbəti mərhələdə ikinci belə bir sənətkarlıq mərkəzinin yaradılması zərurəti yaranıb.

Mərkəz xüsusi dizayn əsasında hazırlanıb və divarları şəbəkə ilə işlənilib, işıqlandırılma sistemi quraşdırlıb.

Mərkəzdə Azərbaycanın ən müxtəlif regionlarından nəfis əl işləri, bal və mürəbbə kimi turistlərin böyük maraq göstərdiyi ərzaq məhsulları təqdim olunur.

Burada təqdim olunan bütün məhsullar onu istehsal etmiş sənətkarın, ailə təsərrüfatının loqotipi ilə işarələnib və üzərində xüsusi ABAD leybli yerləşdirilib. Bu loqotip və ABAD leyblinin olması həmin məhsulun orijinallığından xəbər verir.

Hazırda İçərişəhər və Heydər Əliyev Beynəlxalq Hava Limanında fəaliyyət göstərən ABAD sənətkarlıq mərkəzlərində 115 ailənin 1479 adda 4500-dən çox sənət nümunəsi, 5 ailənin isə 10 adda kənd təsərrüfatı məhsulları (cem, mürəbbə, bal) satışa çıxarılıb.

Azərbaycan Respublikası Prezidentinin 23 sentyabr 2016-cı il 1047 nömrəli Fərmanına əsasən Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində ABAD (Ailə Biznesinə Asan Dəstək)  publik hüquqi şəxs yaradılıb. 

Günel