TECH DİASPORA

ABŞ-nin Chicago şəhərində təhsil alan azərbaycanlı gənclər — İbrahim Cümşüdlü, Əli Şükürov və Ayhan Şahmarov “FitFindAI” adlı süni intellekt əsaslı moda texnologiyası startapı yaradıblar.

Xeberler.az məlumat verir ki, layihə ABŞ-də fəaliyyət göstərən generator Accelerator proqramı tərəfindən 1,6 milyon ABŞ dolları dəyərində qiymətləndirilib. Bu isə startapın perspektivli texnologiya layihəsi kimi dəyərləndirildiyini göstərir. Proqram çərçivəsində seçilmiş startaplara 12 həftə ərzində biznes strategiyası, mentor dəstəyi, investorlarla görüşlər və ilkin investisiya imkanları təqdim olunur.

“FitFindAI” istifadəçilərə istədikləri geyimləri həm mətn vasitəsilə, həm də şəkil yükləməklə axtarmağa imkan verir. Tətbiq istifadəçinin yerləşdiyi əraziyə uyğun olaraq müxtəlif geyim markaları arasında axtarış apararaq uyğun məhsulları təqdim edir.

Hazırda layihə ABŞ bazarı üçün optimallaşdırılıb və ölkə daxilində fəaliyyət göstərir. Komanda yaxın gələcəkdə tətbiqi qlobal bazara çıxarmağı, digər ölkələrdə, o cümlədən Azərbaycanda da istifadəyə verməyi planlaşdırır.

Startap müəlliflərinin sözlərinə görə, layihənin əsas məqsədi alış-veriş prosesini sadələşdirmək, istifadəçilərə vaxt qazandırmaq və moda sahəsində yeni yanaşma formalaşdırmaqdır. Gələcəkdə platformanın daha geniş funksionallığa malik elektron ticarət həllinə çevrilməsi nəzərdə tutulur.

Hazırda komanda layihənin inkişafını sürətləndirmək və beynəlxalq bazarda mövqeyini gücləndirmək məqsədilə investorlarla danışıqlar aparır.

Qeyd edək ki, 19 yaşlı İbrahim Cümşüdlü və Ayhan Şahmarov University of Illinois Chicago, Əli Şükürov isə National Louis University tələbəsidir.