TELEKOMMUNİKASİYA

Azərbaycanda rəqəmsal transformasiyanın sürətləndirilməsi, genişzolaqlı internet infrastrukturunun modernləşdirilməsi, süni intellekt texnologiyalarının iqtisadiyyatın müxtəlif sahələrində tətbiqi, elektron hökumət xidmətlərinin genişləndirilməsi, innovasiya ekosisteminin gücləndirilməsi və yüksəkixtisaslı İKT kadrlarının hazırlanması istiqamətində mühüm proqramlar həyata keçirilir.

Xeberler.az məlumat verir ki, informasiya və rabitə sektoru hazırda qeyri-neft iqtisadiyyatının yüksək əlavə dəyər yaradan aparıcı sahələrindən biri hesab olunur.

İKT sahəsində yüksəkixtisaslı kadr hazırlığını sürətləndirmək məqsədilə müxtəlif təlimlər və təqaüd proqramları təşkil edilir. Bu çərçivədə həyata keçirilən “Technest” Təqaüd Proqramı vasitəsilə indiyədək 10 min yerli mütəxəssis hazırlanıb.

Sektorda fəaliyyət göstərən şirkətlər, fiziki şəxslər və xarici investorlar üçün tətbiq olunan vergi və digər stimullaşdırıcı güzəştlərin İKT sahəsinin inkişafına və investisiya cəlbediciliyinin artmasına müsbət təsir göstərdiyi bildirilir. Hazırda bu güzəştlərin əhatə dairəsinin genişləndirilməsi və Azərbaycanın regionun ən cəlbedici İKT və innovasiya ekosistemlərindən birinə çevrilməsi istiqamətində işlər davam etdirilir. Nəticədə Texnopark rezidentlərinin sayı 182-yə çatıb ki, onlardan 16-sı xarici şirkətdir.

Azərbaycanın innovasiya ekosisteminin regionlarda inkişafı məqsədilə Bakı, Sumqayıt, Naxçıvan və Gəncədə innovasiya mərkəzləri yaradılıb, yüzlərlə startap üçün mentorluq proqramları təşkil olunub.

Ölkənin əsas rəqəmsal hökumət platforması olan "mygov" portalının istifadəçilərinin sayı 3,4 milyon nəfəri ötüb. Platforma vasitəsilə vətəndaşlara 400-dən çox rəqəmsal xidmət təqdim olunur.

Görülən tədbirlər nəticəsində 2026-cı ilin birinci yarısında Azərbaycanın informasiya və rabitə sektoru üzrə gəlirlər ötən ilin eyni dövrü ilə müqayisədə real ifadədə 7,5 faiz artaraq 2 milyard manata yaxınlaşıb. Xüsusilə proqram təminatı xidmətlərindən əldə olunan gəlirlər təxminən 28 faiz artıb ki, bu da ölkədə rəqəmsal həllərə tələbatın və yerli İKT şirkətlərinin fəaliyyətinin genişləndiyini göstərir.

Bununla yanaşı, informasiya və rabitə sektorunun ümumi daxili məhsuldakı payı 1,9 faizə yüksəlib.

Qeyd olunur ki, rəqəmsal infrastrukturun inkişafı, innovasiya və insan kapitalına yatırılan investisiyalar Azərbaycanın rəqəmsal iqtisadiyyatının güclənməsinə, beynəlxalq rəqabət qabiliyyətinin artırılmasına və yüksək texnologiyalar əsasında formalaşan yeni iqtisadi artım modelinə keçidə mühüm töhfə verir.