AVADANLIQ

Məlumat verdiyimiz kimi, 2015-ci ildən Azərbaycanın kompüter avadanlığı istehsalçısı KÜR Tayvanın Acer şirkətinin brendi altında Mingəçevirdə kompüter istehsalına başlayıb.

Belə ki, Mingəçevir texnoparkının rezidenti  HI-Tech Invest  bu kompüter avadanlıqlarının istehsalını üzərinə götürüb.

Əldə etdiyimiz məlumata görə, Mingəçevirdə artıq Lenovo kompüterlərinin də istehsalına başlanıb.

Xeberler.az olaraq hazırda bu istiqamətdə görülən işlərlə maraqlandıq.

HI-Tech Invest şirkətinin istehsal sahəsinin rəisi Orxan Nadirov Xeberler.az-a bildirib ki, Acer şirkəti ilə birbaşa əməkdaşlıq çərçivəsində kompüterlərin yığımı davam edir:

“Acer şirkəti ilə birbaşa əməkdaşlıq edirik. Belə ki, detalları şirkətin özündən alırıq, kompüterlər isə Mingəçevirdə yığılır. Artıq ilkin mərhələdə  kompüterlər istehsal etmişik. Acer şirkətindən gələcək növbəti detalları gözləyirik ki, istehsala başlayaq”.

Şirkət rəsmisinin sözlərinə görə, sifarişlər çox olduğu üçün ilkin mərhələ üçün bütün sifarişləri çatdıra bilməyiblər:

“İlkin mərhələdə bütün sifarişləri yerinə yetirə bilmədik. İstehsal olunmuş kompüterlər də hələ yerli təlabatı  ödəmədiyi üçün satışı kənara çıxara bilmirik. Hələ də ilkin sifarişdən qalanları hazırlayırıq. Özəl sektordan da sifarişlər gəlir, amma daha çox dövlət sifarişləridir. Hazırda növbəti yığıma hazırlaşırıq. Acer şirkətindən detallar gəldikdən növbəti istehsal prosesinə başlayacağıq”.

Orxan Nadirov deyib ki, indiyədək Acer 7 modelləri istehsal edilib.  Belə ki, bu günə qədər 1000-dən çox kompüter istehsal edilərək, satılıb.

O, Lenovo məhsullarının da istehsal məsələsinə toxunub:

“Növbəti istehsal proseində Acer-in digər modelləri də olacaq. Hazırda Lenovo şirkəti ilə də danışıqlar davam edir. Bu modelləri də Mingəçevirdə yığımına hazırlaşırıq”.

Məlumata görə, texnoparkda qeyd edilən şirkətin bütün növ kompüterləri yığılır.

Onun sözlərinə görə, hazırda istehsal prosesində  30-a qədər mütəxəssis çalışır. Onların əksəriyyəti isə Mingəçevir sakinləridir.

Qeyd edək ki, bu günə qədər satılan kompüterlərin qiyməti 600- 1000 AZN təşkil edib. Növbəti mərhələdə istehsal olunacaq avadanlıqların qiyməti hələlik məlum deyil.

HI-Tech Invest şirkəti Cənubi Qafqaz regionunda kompüter avadanlığı və elektronika montaj-line istehsal edən yeganə şirkətdir.

HI-Tech Invest Şirkət Yüksək Texnologiyalar Parkı-nın rezidenti statusunu almış və texnologiyalar parkının Mingəçevir filialında fəaliyyət başlayıb.  Şirkət   Mingəçevir  inkubasiya biznes mərkəzinin rezidentidir.

Məltəm Talıbzadə