İNTERNET

Azərbaycanın telekommunikasiya və poçt xidmətləri üzrə tənzimləyici qurumu olan İnformasiya Kommunikasiya Texnologiyaları Agentliyinin (İKTA) təşəbbüsü ilə ölkədə internet infrastrukturunun inkişafı istiqamətində növbəti mühüm addım atılıb.

Xeberler.az məlumat verir ki, agentliyin Ookla şirkəti və internet servis provayderləri ilə birgə koordinasiyalı fəaliyyəti çərçivəsində Aztelekom MMC tərəfindən abunəçilərin internet sürətinin ölçülməsinin optimallaşdırılması məqsədilə şəbəkəyə əlavə 8 ədəd “Ookla sponsor” serveri inteqrasiya edilib.

Bununla da operatorun Bakı, Xırdalan, Şirvan, Şamaxı, Quba, Masallı, Yevlax, Xankəndi, Gəncə və Zaqatala daxil olmaqla müxtəlif regionlarda yerləşən sponsor serverlərinin sayı 10-a, Bakı Telefon Rabitəsi MMC-nin serverləri ilə birlikdə isə 12-yə çatdırılıb.

Məlumata görə, sponsor serverlərin sayının artırılması İKTA-nın 2025-ci il üzrə internet ölçmə nəticələrinin yaxşılaşdırılması məqsədilə hazırlanmış tədbirlər planı çərçivəsində həyata keçirilib. Plan internet performansının ölçülməsi infrastrukturunun gücləndirilməsi, regional ölçmə nöqtələrinin artırılması və nəticələrin daha obyektiv formalaşdırılmasını nəzərdə tutur.

Qeyd olunub ki, ötən il İKTA mütəxəssisləri tərəfindən “Ookla” “Speedtest” serverlərinin qiymətləndirilməsi aparılıb. Monitorinqlər zamanı mövcud 38 server yoxlanılıb və aşkarlanan çatışmazlıqlar operator və provayderlərə təqdim edilib.

Hazırda ölkə üzrə sponsor serverlərin ümumi sayı 54-ə çatıb.

Bildirilib ki, “Ookla”nın “Speedtest Index” platforması internet performansını median yükləmə (download), ötürmə (upload) sürəti və gecikmə (latency) göstəriciləri əsasında qiymətləndirən ən geniş istifadə olunan beynəlxalq mexanizmlərdən biridir. Sponsor serverlərin coğrafi baxımdan genişləndirilməsi ölçmələrin istifadəçilərə daha yaxın nöqtələrdə aparılmasına imkan yaradır ki, bu da nəticələrin daha dəqiq və obyektiv formalaşmasına şərait yaradır.

Mütəxəssislər qeyd edirlər ki, qlobal təcrübədə internet xidmətlərinin keyfiyyəti artıq yalnız elan edilən sürətlə deyil, beynəlxalq ölçmə platformalarında təsdiqlənən real nəticələrlə qiymətləndirilir. Azərbaycanda da bu istiqamətdə mərhələli şəkildə ölçüləbilən internet modelinə keçid həyata keçirilir.

Bu model çərçivəsində xidmət keyfiyyəti real vaxt ölçmələri əsasında qiymətləndirilir, nəticələr müqayisə olunur və infrastrukturun optimallaşdırılması üçün texniki əsas formalaşdırılır. Bu yanaşma həm istehlakçıların məlumatlı seçim etməsinə, həm də bazarda sağlam rəqabətin güclənməsinə xidmət edir.

Qeyd edək ki, bu təşəbbüs İKTA-nın telekommunikasiya sektorunda şəffaflığın artırılması, xidmət keyfiyyətinin yüksəldilməsi və istehlakçı məmnuniyyətinin gücləndirilməsi istiqamətində həyata keçirdiyi sistemli tədbirlərin tərkib hissəsidir.