AZNET

Rəqəmsal İnkişaf və Nəqliyyat Nazirliyi yanında Kosmik Agentlik ("Azərkosmos") Beynəlxalq Astronavtika Konqresinə yalnız ev sahibliyi edir, biletlərin qiymətini, konqresinin proqramını və digər məsələlər Beynəlxalq Astronavtika Federasiyası tərəfindən müəyyənləşdirilir.

Xeberler.az məlumat verir ki, bunu "Azərkosmos" QSC-nin mətbuat xidmətinin rəhbəri Fidan Behbudova Beynəlxalq Astronavtika Konqresinə dair brifinqdə deyib.

"Biz qiymətlə bağlı məsələyə müdaxilə edə bilmirik. Ötən il Parisdə keçirilən tədbirdə də qiymət bu il olduğu kimi idi. Əksər hallarda hər il təqdim edilən qiymətlər ondan əvvəlki illə müqayisədə artırdı. Amma Bakıda keçiriləcək tədbirdə qiymətlər Parisdəki qiymətlərlə eyni saxlanıldı", - deyə F. Behbudova vurğulayıb.

Xatırladaq ki, 74-cü Beynəlxalq Astronavtika Konqresi bu il oktyabrın 2-6-da Bakıda keçiriləcək. Bakı Konqresi kosmik sahədən olan 22 şirkətin əldə etdiyi sponsorluq paketinin sayına görə rekord həddə çatıb. Bakı beynəlxalq sponsorluq paketinin satışı üzrə Avstraliya, Almaniya, ABŞ, Birləşmiş Ərəb Əmirlikləri və Fransada keçirilən Konqresləri geridə qoyub. Bakı Konqresi təkcə sponsorluq paketinin sayına görə deyil, həmçinin, elmi məqalələrin təqdim olunduğu ölkələrin sayına görə də rekord əldə edib. Əvvəlki konqreslərdən fərqli olaraq Bakı Konqresinə 95 ölkədən kosmos sahəsində fəaliyyət göstərən elm və tədqiqatçılar tərəfindən 3 600 elmi məqalə təqdim olunub.Bununla Bakı Konqresi Paris (2022), Vaşinqton (2019) və Bremen (2018) konqresləri ilə birgə indiyə kimi keçirilən bütün konqresləri geridə qoyub.