TƏDBİRLƏR

Sentyabrın 30-da Bakı Konqres Mərkəzində Azərbaycanın Kosmik Agentliyinin ("Azərkosmos") təşkilatçılığı ilə Azərbaycanın media nümayəndələri üçün mediatur təşkil olunub.

Xeberler.az məlumat verir ki, mediatur çərçivəsində rəqəmsal inkişaf və nəqliyyat nazirinin müşaviri Rəşad Bayramov 74-cü Beynəlxalq Astronavtika Konqresinin 50 ildən sonra yenidən Bakıda keçirilməsini böyük müvəffəqiyyət kimi dəyərləndirib.

Nazir müşaviri bildirib ki, Azərbaycan regionda Astronavtika Konqresi kimi mötəbər tədbirə ev sahibliyi edən ilk ölkədir.

“Azərkosmos”un İctimaiyyətlə əlaqələr və kommunikasiya qrupunun rəhbəri Fidan Behbudova media nümayəndələrini Bakı Konqres Mərkəzi, Konqresin Sərgi pavilyonu və Heydər Əliyev Mərkəzində tədbirlərin keçiriləcəyi məkanlarla tanış edib və ətraflı məlumat verib.

F.Behbudova qeyd edib ki, Bakı Konqres Mərkəzində 190-dan çox müxtəlif kosmik mövzularda panel sessiyalar keçiriləcək. Həmçinin burada media üçün media mərkəzi və böyük konfrans zal Konqres çərçivəsində baş tutacaq mətbuat konfransları üçün nəzərdə tutulub. Həmçinin Konqres Mərkəzində uşaqlar üçün xüsusi zona ayrılıb.

Mediatur zamanı Bakı Konqresində 250-dən çox media nümayəndəsinin qeydiyyatdan keçdiyini diqqətə çatdıran Fidan Behbudova bildirib ki, media iştirakçılarının 60-dan çoxu xarici KİV-lərin təmsilçiləridir.

Daha sonra media nümayəndələri Konqresin Sərgi pavilyonu ilə tanış olublar. Heydər Əliyev Mərkəzi və Bakı Konqres Mərkəzinin ərazisində inşa edilmiş 7800 kvadratmetrlik sərgi pavilyonunda müxtəlif ölkələrin kosmik qurumları və şirkətlərinin stendləri qurulub. Sərgi pavilyonunda 50-dən çox təşkilatla iştirakla bağlı müqavilə imzalanıb. Agentlik və şirkətlər arasında ABŞ-ın “Milli Aeronavtika və Kosmos Administrasiyası” (NASA), Yaponiyanın “JAXA” kosmik agentliyi, İtaliyanın “Agenzia Speziale Italiana” kosmik agentliyi, “AIRBUS” şirkəti, Kanadanın innovasiya mərkəzi “INO”, Fransanın Milli Kosmik Tədqiqatlar Mərkəzi “CNES”, Hindistanın kosmik agentliyi “ISRO”, Türkiyənin “Türkiye Uzay Ajansı” kosmik agentliyi və digər beynəlxalq şirkətlər yer alıb.

Bildirilib ki, “Azərkosmos” və Beynəlxalq Astronavtika Federasiyasının tərəfdaşlığı ilə keçiriləcək 74-cü konqres çərçivəsində konfranslar, 190-dan çox texniki sessiya və sərgilər təşkil olunacaq.

Texniki sessiyalar görkəmli memar Zaha Hadidin layihələndirdiyi möhtəşəm Heydər Əliyev Mərkəzində baş tutacaq.

Oktyabrın 2-də rəsmi açılış mərasimi olacaq Bakı Beynəlxalq Astronavtika Konqresində kosmik agentliklərin, dövlət sektorunun, investorlar və özəl kosmik şirkətlərin nümayəndələri, yerli və beynəlxalq media qurumlarının təmsilçiləri, ümumilikdə 4 mindən çox nümayəndə iştirak edəcək.