İNNOVASİYA VƏ STARTAP

Baku Business Factory (BBF) Azərbaycan Turizm və Menecment Universitetində təqdimat və seminar təşkil edib.

BBF-dən Xeberler.az-a verilən məlumata görə,  "Tələbə olarkən necə biznes qurdum?" mövzusunda keçirilən seminarın məqsədi tələbələrin biznesə olan marağının artırılması, onların bu sahədə maarifləndirilməsi olub.

BBF-nin layihə meneceri Toğrul Səmədov seminarda tələbələrə şəxsi biznes qurmağın sirlərindən danışıb. Natiq tələbə olduğu müddətdə qarşılaşdığı çətinliklərdən, mövcud problemləri və imkanları dəyərləndirmək yolu ilə öz biznesini necə qurmasından danışıb.

Bildirib ki, biznesi qurmaq üçün imkanları dəyərləndirmək, problemləri həll etmək, çox və məqsədli çalışmaq, risq etmək vacib şərtlərdəndir.

Toğrul Səmədov təqdimatın sonunda tələbələrin suallarını da cavablandırıb.

Qeyd olunub ki, bu cür təqdimatlar digər universitetlərdə də həyata keçiriləcək.

BBF-dən  verilən məlumata görə, gələcəkdə universitetlərdən bəyəndikləri startap layihələri üçün Factory-də imkan yaradacaqlar ki, onlar  layihələrini inkişaf  etdirib, qlobal bazara çıxara bilsinlər.

Qeyd edək ki, Baku Business Factory-nin (BBF) əsas məqsədi gənclərin biznes təşəbbüslərinin dəstəklənməsidir.

Müxtəlif sahələrə aid biznes ideyaları olan gənclər BBF-də öz ideyalarını biznesə çevirmək imkanı əldə edə bilərlər.

Onlar BBF-dən ofis, mentor və maddi dəstək alacaq və davamlı olaraq müxtəlif təlimlərdə iştirak edə bilərlər.

BBF-nin missiyası biznes yönümlü ideyaları olan gənclərin biznes təfəkkürlərinin inkişaf etdirilməsi və onlar üçün maddi bazanın təmin edilməsini kompleks şəkildə həyata keçirməklə ölkəmizdə yeni biznes vərdişlərinin formalaşdırılmasıdır.

Məltəm Talıbzadə