STARTAP AZƏRBAYCAN

Məlumat verdiyimiz kimi, bir müddət öncə gənclərin biznes təşəbbüslərinin dəstəklənməsi üçün Baku Business Factory (BBF) adlı yeni inkubasiya mərkəzi təsis edilib.

BBF-in missiyası biznes yönümlü ideyaları olan gənclərin biznes təfəkkürlərinin inkişaf etdirilməsi və onlar üçün maddi bazanın təmin edilməsini kompleks şəkildə həyata keçirməklə ölkəmizdə yeni biznes vərdişlərinin formalaşdırılmasıdır.

Xeberler.az-ın məlumatına görə, artıq bir neçə gündür ki, BBF-də Startap laboratoriyası da fəaliyyətə başlayıb və BBF-ə startap layihələrinin müraciətləri davam edir.

Qeyd edək ki, BBF-ə startap müraciətləri may ayından qəbul edilir. Daxil olan müraciətlərin seçilməsi prosesi isə sentyabrdan  həyata keçirilir.

Belə ki,  seçilən layihələrə mürəkkəbliyindən və gəlir gətirəcəyi müddətdən asılı olaraq müəyyən vaxt veriləcək. Bu müddət ərzində startaplar BBF-dən ofis və ofis avadanlıqları, yerli və xarici ekspertlər tərəfindən mütəmadi keçiriləcək biznes və menecment təlimlərində iştirak, mentorluq xidmətləri və investisiya almaq imkanı da əldə edə biləcəklər. Eləcə də, uğurlu layihələrin dünya bazarına çıxmasına və ixracat qabiliyyətinin artırılmasına BBF tərəfindən dəstək göstəriləcək.

Müraciətlərin qəbulu hazırda davam edir. Biznes ideyasına sahib olan gənclər layihələrini BBF-in saytına (http://bbf.az/az/form/project) daxil olaraq öz anketlərini göndərə bilərlər.

BBF elan edir ki, Mərkəz tərəfindən nəzərdən keçirilən müraciətlərdən kriteriyalara uyğun olanları seçiləcək və ideyanın sahibləri ilə görüşüləcək. Müsahibədən uğurla keçən layihələr üçün BBF komandası və layihə rəhbərləri birlikdə biznes plan tərtib edəcəklər. Yalnız biznes plan hazır edildikdən sonra BBF-in Seçim Komissiyası tərəfindən qərar veriləcək və bu qərar əsasında təşkilat seçilən layihənin ideya sahibləri tərəfindən həyata keçirilməsinə dəstək göstərəcək.

 Məltəm Talıbzadə