İNNOVASİYA VƏ STARTAP

Keçən ilin may ayının 4-də fəaliyyətə başlayan Baku Business Factory ( BBF) 1 yaşını qeyd edir.

Təşkilatdan Xeberler.az-a verilən məlumata görə, ümumilikdə, BBF 1 il ərzində 550-ə yaxın müraciət qəbul edib.  Bu müraciətlər arasından seçilən layihələr və frilanserlər BBF-in xidmətlərindən istifadə edərək öz bizneslərini qurmaq və inkişaf etdirmək yönündə dəstəklər alıb.

 Hazırda təşkilatın xidmətlərindən 19 layihə və 3 nəfər frilanser olmaqla 70 nəfərə yaxın şəxs yararlanır. Bu layihələrdən 13-ü artıq kommersiyalaşmışdır ki, onlardan 2-i hazırda öz xidmət və məhsullarının ixracı üzərində çalışırlar. Qalan 6 layihə isə hazırlıq mərhələsindədirlər.

1 il ərzində BBF tərəfindən seçilən layihələrə ofis və ofis avadanlıqları, mentorluq, biznes mövzusunda müxtəlif təlim xidmətləri göstərilmişdir. Bu xidmətlər xaricində eyni sektorda fəaliyyət göstərən başqa şirkətlərlə də əməkdaşlıqlar edilərək müxtəlif layihələrə imza atılıb.

Eyni zamanda 2015-ci ilin oktyabr ayında BBF “I Bakı Biznes Forumu”nu təşkil edərək ölkəmizdə startap mühitinin inkişafı və təbliği ilə bağlı müəyyən işlər görüb.

Hazırda BBF-də 19 startap layihəsi çalışır.

“Baku Business Factory”nin bütün işlərini həyata keçirərkən əsas diqqət etdiyi məqamlardan biri də ölkə iqtisadiyyatının şaxələnməsinə töhvə verməkdir. Təşkilatın təsisçisi Anar Əlizadə (www.anaralizade.com) öz şəxsi bloqunda da bu məqama xüsusi diqqət ayırdıqlarını vurğulamışdır. Onun sözlərinə görə, təşkilat biznes layihələrini seçərkən təkcə onların rəqabət göstərdiyi təşkilatlardan fərqlənməsinə deyil, onların bir-birindən fərqlənməsinə də əhəmiyyət verir. Bunun nəticəsi olaraq hazırda BBF-in xidmətlərindən istifadə edən 19 layihə bütün 4 əsas iqtisadi sektoru, yəni istehsal, xidmət, ticarət və kənd təsərrüfatı sektorlarını, əhatə etməklə 15 ayrı biznes fəaliyyəti növünü əhatə edir.

Gənclərin biznes təşəbbüslərinin dəstəklənilməsi yönündə aparılan işlərin nəticəsi olaraq BBF 2016-cı ilin fevral ayında “Business Time” jurnalı tərəfindən Azərbaycanda hər il üçün müəyyən edilmiş sahələr üzrə ən yaxşı şirkətlərin seçildiyi “Azeri Business Award” Milli Mükafatına layiq görülmüşdür. Bu yöndə BBF ilin gənclərlə bağlı biznes təşəbbüsü nominasiyası üzrə ilin ən yaxşı şirkəti seçilib.

Xatırladaq ki, Baku Business Factory azərbaycanlı iş adamı, Union Grand Energy PTE  Şirkətlər Qrupunun təsisçisi Anar Əlizadənin (www.anaralizade.com) təşəbbüsü ilə yaradılıb.

Məltəm Talıbzadə