BBF milli startapların qlobal bazara çıxmasına kömək edəcək

14-07-2015 / 16:56

Məlumat verdiyimiz kimi, bir müddət öncə gənclərin biznes təşəbbüslərinin dəstəklənməsi üçün Baku Business Factory (BBF) adlı yeni inkubasiya mərkəzi təsis edilib.

BBF-in missiyası biznes yönümlü ideyaları olan gənclərin biznes təfəkkürlərinin inkişaf etdirilməsi və onlar üçün maddi bazanın təmin edilməsini kompleks şəkildə həyata keçirməklə ölkəmizdə yeni biznes vərdişlərinin formalaşdırılmasıdır.

Hazırda, Mərkəzdə bir neçə tanınmış layihəyə yer verilib və onlar öz bizneslərini qurmaq istiqamətində çalışırlar.

Xeberler.az BBF-in hazırki fəaliyyəti və gələcək istiqamətləri ilə maraqlanmaq üçün Baku Business Factory-da olub.

BBF-in marketinq meneceri Rəşad Məmmədli təşkilat ilə bağlı bizə ətraflı məlumat verib.

İnkubasiya mərkəzinin fəaliyyəti iki hissəyə bölünüb: Kovörkinq və Startap mərkəzi.

Kovörkinq  mərkəzi - bu ilin may ayının əvvəlində fəaliyyətə başlayıb. Mərkəzdə hazırda bir neçə layihə fəaliyyət göstərir. Ümumilikdə 38 nəfərlik yer olan mərkəzdə hazırda 22 nəfərlik yer tutulub. Burada 8 layihə və iki nəfər frilanser (sifarişlə işləyən) öz fəaliyyətlərini həyata keçirirlər. Onların bəziləri artıq çoxlarınıza tanışdır: Smartplane, Manads, Mobchannel, Alkredit.az, Soteqa, Online Add Networks, Mediator, Nəqşicahan və qrafik dizaynla məşğul olan iki nəfər frilanser.

Öyrənirik ki, BBF təsis olunduğu gündən etibarən Kovörkinq mərkəzindən  istifadə etmək üçün 115 müraciət daxil olub. BBF İdarə Heyəti tərəfindən adını qeyd etdiyimiz layihələr seçilərək mərkəzdə öz fəaliyyətlərini həyata keçirməyə başlayıblar. Hazırda burada 16 yer boşdur və seçim üçün müraciətlərin göndərilməsi davam edir.

Layihələrin qəbul olunma qaydaları  ilə də maraqlandıq. Məlum oldu ki, daxil olan bütün müraciətlər toplanaraq həftədə bir dəfə idarə heyətinə təqdim edilir və layihələr onlar tərəfindən seçilir. Daha sonra seçilən layihələrin rəhbərləri ilə görüşülür və  həmin layihəyə Kovörkinq mərkəzində yer verilməsi ilə bağlı qərar verilir. Seçimdə daha çox layihənin biznes potensialına diqqət yetirilir, yəni ideyanın yaradıcılığı, rəqabət üstünlükləri, müştəri ehtiyaclarının nə qədər sadə yollarla qarşılanması kimi amillər əsas şərtlərdir.

BBF-də işləməyə başlayan layihələr ofisin bütün imkanlarından: iş masası, hüquqi ünvan, şəhər telefonu, resepşn, internet, printer, skaner, iclas otaqları, oyun zalı və mətbəxdən  tamamilə ödənişsiz istifadə edirlər. Onlar, həmçinin, gələcəkdə BBF tərəfindən təşkil olunacaq təlimlərdə də iştirak edə biləcəklər.

BBF-in Startap mərkəzi isə sentyabr ayından fəaliyyətə başlayacaq. Hazırda startapçıların müraciətləri qəbul olunsa da layihələrin seçimi və qəbulu payızda həyata keçiriləcək. Bütün müraciətlər bazaya toplanır. Bu günə kimi Startap layihəsi üçün göndərilən müraciətlərin sayı 73-dür.

Startaplar üçün ayrılan Mərkəzdə də olduq. Burada 16 nəfərlik yer ayrılıb. Aldığımız məlumata görə, startaplar üçün daha geniş dəstək proqramı olacaq. Belə ki, startaplara mentor dəstəyi, mühasibatlıq, marketinq dəstəyi olacaq,  yerli və xarici  mütəxəssislərin iştirakı ilə daimi təlimlər təşkil olunacaq. Həmçinin seçilən layihələrə inevstisiya dəstəyi də göstəriləcək. Startap mərkəzinin planında sponsorluq və universitetlərlə əməkdaşlıqlar da var.

BBF-in əsas məqsədi ölkədə gənclər arasında biznes vərdişlərinin formalaşdırılmasına,  dərinləşdirilməsinə və onların öz ideyalarını biznesə çevirməsinə dəstək olmaqdır. Təşkilatın təsisçisi, Anar Əlizadə öz şəxsi portalında da BBF-i təsis etməsi məqsədini açıqca vurğulayıb.

Seçilən layihələrdən heç bir maddi qarşılıq tələb etməyən BBF-in tək gözləntisi odur ki, onlar öz layihələrini inkişaf etdirib irəli getsinlər və qlobal bazarda rəqabət aparan şirkətlərə çevrilsinlər.

“Baku Business Factory” (BBF) şəhərin mərkəzində Nizami küçəsi 203 ünvanında, AF Business House-un 3-cü mərtəbəsində yerləşir. Ofisin ərazisi 620 kvadrat metrdir.

 

Məltəm Talıbzadə

 

ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.