TƏDBİRLƏR

Məlumat verdiyimiz kimi, Azərbaycandan olan layihə ABŞ-da keçirilən 2016 GİST-İ beynəlxalq müsabiqəsinin yarımfinalında iştirak hüquqi qazanıb.

Qeyd edək ki, 135 ölkə arasında keçirilən müsabiqədə ümumilikdə 1075 ərizə qəbul olunub.

Azərbaycandan təqdim olunan HealthBox adlı innovativ layihə beynəlxalq ekspertlər tərəfindən müsbət qiymətləndirilib.

Layihənin rəhbəri Hippokrat Tibb Mərkəzinin baş icraçı direktoru Leyla Tağızadədir.

Müsabiqənin final mərhələsi üçün layihələrə səsvermə  aprel ayının 1-dən may ayının 1-nə kimi keçiriləcək.

Yarımfinala çıxmış 102 layihə arasında 30 ən çox səs yığan layihə seçiləcək. Finalçılar  Elm və Texnologiya üzrə Qlobal Sammitdə öz işlərini təqdim edəcək.

Qeyd edək ki, HealthBox layihəmiz yarışmada hazırda 8-ci yerdədir.

Hər il sammitin açılışını ABŞ prezidenti Barak Obama  özü elan edir. Bu il finalçılar ABŞ prezidenti ilə görüşmək, layihələrinin inkişafı üçün investisiya cəlb etmək, qlobal elm, texnologiya sahəsində faydalı əlaqələr qurmaq, investorlarla qarşılaşmaq imkanı əldə edəcəklər. Yarımfinala Azərbaycan ilə birlikdə, qonşu Gürcüstan və Ermənistandan olan layihələr də yer alıb.

Eyni zamanda səs verənlər, öz ölkəsini 2017-ci ildə keçiriləcək GİST regional təlim düşərgəsinə nominasiya edə bilər.

Səs vermək üçün buraya daxil olub, siyahıda Azərbaycandan olan layihəni seçmək lazımdır.

Qeyd edək ki, Elm və Texnologiya üzrə Qlobal Sammit  - 2016 GİST-İ ABŞ Dövlət Departamenti və AAAS ( Amerika Elmə Dəstək Assosiasiyası) tərəfindən hər il keçirilən müsabiqədir. Qlobal sammit bu il 20-24 iyun tarixlərində ABŞ-ın Kaliforniya ştatında, Silikon Vadisində keçiriləcək.

 Məltəm Talıbzadə