TƏDBİRLƏR

Xəbər verdiyimiz kimi, noyabrın 16-da ölkənin əsas internet təchizatçısı Delta Telecom şirkətində yanğın baş vermişdi. Bunun da nəticəsində ölkədə 6 saat müddətində internet olmamışdı.

Məlumat verildiyi kimi, baş vermiş hadisə zamanı zərər dəyən avadanlıqların yenisi ilə əvəz edildiyi və infrastrukturun yeniləndiyi bildirilirdi.

Bu istiqamətdə Delta Telecom tərəfindən fəaliyyətlər davam edirdi.

Şirkətdən Xeberler.az-a verilən məlumata görə, artıq Delta Telecom bərpa ilə bağlı işləri tam olaraq başa çatdırıb və bütün avadanlıqlar yenilənib.

Yeni quraşdırılan avadanlıqlar və sistem testdən keçirilib.

Şirkətdən bildirilib ki, gələcəkdə bu tip problemlərin bir daha təkrarlanmaması üçün ölkəyə daxil olan trafikin paylanılması sistemi də yenidən qurulub. Belə ki, bir neçə alternativlər, ehtiyat sistemlər hazırlanıb. Həmçinin ölkəyə daxil olan internetin birbaşa regionlardan ölkəyə paylanılmasını təşkil etmək üçün bir neçə bölgədə də alternativ Data Mərkəzləri yaradılıb.

Məlumatda qeyd edilib ki, bu Data Mərkəzlər Delta Telekom şirkətinin əsas paylayıcı hissəsindən asılı olmayaraq da ölkəyə internet təminatını həyata keçirə biləcək.

Məlum olduğu kimi,  əvvəllər ölkəyə daxil olan internetin ölkə üzrə paylanılması bir nöqtədən həyata keçirilirdi. Bu məqsədlə qanunvericilikdə nəzərdə tutulduğu qaydada MTN tərəfindən yaradılan Data Mərkəzindən istifadə edildiyi və onun da alternativinin olmadığı bildirilirdi.

Həmçinin də regionlarda bu tip Data Mərkəzlərinin olmaması  regionlardan birbaşa internet təminatının həyata keçirilməsinə imkan vermirdi.

Delta Telecom şirkətindən Xeberler.az-a verilən məlumata görə, ölkəyə daxil olan və paylanılan internet trafiki üzrə infrastruktura kənar müdaxilələrin, kənar informasiya sistemlərinin və telekommunikasiya şəbəkələrinin qoşulmasının qarşısını almaq üçün əlavə tədbirlər görülüb.

Artıq şirkətin qarşısında yeni tələblərin qoyulduğu bildirilir. Belə ki, bu sistemə qoşulmaq istəyən qurumlar öz şəbəkələrini və infrastrukturnu Delta Telecom-un infrastrukturuna uyğunlaşdırmalıdır.

Delta  Telecom şirkətindən Xeberler.az -a bildirilib  ki, Azərbaycana dörd müxtəlif istiqamətlərdən, Avropa üzərindən, Türkiyə və Rusiyadan, digər ölkələrdən daxil olan internet trafikinin ölkə ərazisindəki bir neçə Data Mərkəzləri vasitəsilə, ehtiyat sistemlər vasitəsilə paylanılması üçün zəruri olan bütün işlər başa çatdırılıb.

Məltəm Talıbzadə