TƏHLÜKƏSİZLİK

Xəbər verdiyimiz kimi, noyabrın 16-da ölkənin əsas internet təchizatçısı Delta Telecom şirkətində yanğın baş vermişdi. Bunun da nəticəsində ölkədə 6 saat müddətində internet olmamışdı.

İndiyədək bir sıra rəsmi şəxslərin çıxışlarında problemin, yəni yanğına səbəbin  texniki xəta olduğu bildirilirdi.

Bununla belə Xeberler.az və ekspertlər yanğının bu qurumda Telekommunikasiya haqqında Qanunun 39-cu maddəsinə uyğun olaraq quraşdırılan MTN-nin Data Mərkəzi ilə əlaqəli ola biləcəyini vurğulamışdı.

Bir müddət öncə  Delta Telecom-un Baş direktoru Ramazan Vəliyev ANS TV-də çıxış edərkən bu ehtimalların tamamilə həqiqətə uyğun olduğunu bir daha təsdiqlədi.

Bununla belə yanğının hansı ərazidə olması bilinsə də ,əslində hələ də yanğının hansı səbəbdən olması haqqında rəsmi açıqlama verilməyib.

Son günlərdə isə yanğının baş vermə səbəbi ilə bağlı maraqlı məqamlar ortaya çıxıb.

Xeberler.az  AzPolitika.info-ya  istinadən bildirir verir ki,  yanğının birbaşa müdaxilə, təxribat nəticəsində ola biləcəyi haqqında əsaslı şübhələr var.

Belə ki, məlumata görə, MTN Delta Telecom-da yalnız özünün hansısa məqsədlər üçün istifadə etdiyi avadanlığı yerləşdirməklə kifayətlənməyib.

AzPolitika.info bildirib ki, MTN öz avadanlığının yerləşdiyi otaqlara – fiber  optik kabellərin olduğu hissəyə daxil olmaq imkanı olan Delta Telecom-un əmkdaşlarından birini (bəlkə də daha çoxunu-müəl.) hansısa vasitə ilə əməkdaşlığa da cəlb edib. Yəni, şirkət daxilində özünə işləyən, onun əmrini icra edən şəxslər də müəyyənləşdirib. Mənbənin sözlərinə görə, bu fakt da məhz Delta Telecom-da yanğından sonra məlum olub.

Belə ki, istintaq zamanı Delta Telecom-un  fiber optik kabellərin olduğu hissədə çalışan əməkdaşlarından birinin yanğından bir gün qabaq ölkəni tərk etdiyi məlum olub.

Rəsmi açıqlama verilməsə də, hadisənin məhz həmin şəxs tərəfindən törədildiyi ehtimal edilir.

Hazırda axtarışda olduğu deyilən həmin şəxsin ad-soyadını dəqiqləşdirmək cəhdləri isə baş tutmayıb.

Ekspertlər bildirilər ki, əgər təxribat faktı təsdiqlənərsə, məsələ daha da ciddiləşəcək  və tamamilə yeni məqamlar ortaya çıxa bilər.

Belə ki, təxribatın məhz prezidentin ölkədə olmadığı müddətdə həyata keçirilməsi bunun öncədən planlaşdırıldığını göstərir  və ölkədə uzunmüddətli informasiyasızlıq mühiti yaradılmasına, ölkəni qlobal dünyadan təcrid edilməsinə yönəlib.

Bütün bunlar isə şübhələnmək üçün əsaslar verir ki, yanğının törədilməsində təşkilatçıların tamamilə başqa məqsədləri olub.

Xeberler.az bir daha bildir ki,  Delta Telecom-da yanğın  baş verən gündən xeyli müddət ötsə də, onun səbəbləri haqqında hələ də rəsmi açıqlama verilməyib.

Xeberler.az