TƏHLÜKƏSİZLİK

Məlum olduğu kimi, noyabrın 16-da ölkənin əsas internet təchizatçısı Delta Telecom şirkətində yanğın baş vermişdi. Bunun da nəticəsində ölkədə 6 saat müddətində internet olmamışdı. Bu günlərdə Delta Telecom-dan bildirilib ki,   yanğından sonrakı fəsadlar aradan qaldırılıb və bərpa  işləri də tam başa çatdırılıb.

Məsələnin ən vacib tərəfi isə hələ də açıq qalıb. Belə ki, şirkətdə baş verən yanğının səbəbi ilə bağlı müxtəlif versiyalar səslənsə də, bununla bağlı rəsmi məlumat verilmədi.

Qeyd edək ki, indiyədək yanğının baş vermə səbəbi açıqlanmayıb.

Xeberler.az bu məsələni mütəmadi diqqətdə saxlayır.

Məlumat verildiyi kimi, Baş Prokurorluğun və digər qurumların hadisə yerində təhqiqat apardığı bildirilirdi.

Amma hələ də ortada bir nəticə və rəsmi açıqlama yoxdur. Yalnız Delta Telecom rəhbəri bildirib ki, yanğın MTN-nin Delta Telecom-dakı Data Mərkəzində baş verib və digər sahələrə yayılıb.

Ölkənin bütün internet trafiki məhz bu Mərkəzdən keçirdi. Telekommunikasiya haqqında Qanunun 39-cu Maddəsinə uyğun olaraq qurulan bu sistemin isə alternativi olmadığından bərpa prosesi uzun çəkib.

Bir sıra rəsmi şəxslər və ekspertlər isə yanğınla bağlı müxtəlif səbəblər, ehtimallar qeyd ediblər ki, hadisə buradakı kabellərdə, elektrik sistemində olan qısa qapanma və texniki qəza ilə bağlı ola bilər.

Həmçinin mediada yanğının təxribat-terror nəticəsində ola biləcəyi ehtimalları da qeyd edilib.

Məlumat verdiyimiz kimi, ekspertlər də müxtəlif məqsədlərlə bu hadisənin qəsdən törədilə biləcəyi ilə bağlı versiyalar səsləndiriblər.

“MTN işi” ilə bağlı proseslərdə XDMX-nin yaxından iştirak etməsi və əməliyat-axtarış tədbirləri ilə bağlı bu qurumun səlahiyyətlərinin artırılması səbəbindən qeyd olunan terrorun məhz bu qurumu və onun rəhbərliyini gözdən salmaq üçün edilə biləcəyi ilə bağlı versiyalar da irəli sürülüb.

Ümid edirik ki, yaxın zamanda problemlə bağlı ətraflı, rəsmi açıqlama veriləcək. O zaman bu versiyaların hansının doğru olduğu məlum olacaq.

Məltəm Talıbzadə