E - HÖKUMƏT

Rabitə və Yüksək Texnologiyalar Nazirliyinin Məlumat Hesablama Mərkəzi (MHM) tərəfindən "Elektron hökumət" portalı üzərindən təqdim olunan e-arayışlardan istifadə dinamikası artır. Bu xidmət qısa müddət ərzində bütün vətəndaşlar tərəfindən rəğbətlə qarşılanıb.

İlk e-arayışların istifadəyə verilməsindən 6 aya yaxın vaxt keçməsinə baxmayaraq, banklar tərəfindən 130 minə yaxın vətəndaşa e-arayışlar əsasında müxtəlif kreditlər verilib. Real faktdır ki, kağız üzərində olan ənənəvi arayışların (həmçinin, bu qisimdən olan bütün sənədlərin) əldə olunması zamanı yaşanan problemlərin aradan qaldırılması öz həllini tapıb.

"Elektron hökumət" infrastrukturunun yaradılması ilə bu tip, ilk baxışdan kiçik görünən, lakin ətraflı təhlil etdikdə mühüm sosial maneə xarakteri daşıyan problemin tamamilə aradan qaldırılmasına münbit şərait yaranıb.

Xeberler.az-ın məlumatına görə, bu barədə  Məlumat Hesablama Mərkəzindən bildirilib.

Mərkəzin şöbə müdiri İlqar Abdullayev deyib ki, “ASAN xidmət” mərkəzlərində e-arayışların reklam lövhələri yerləşdirilsə, vətəndaşlara e-arayışlar təqdim olunsa e-xidmətdən istifadə sayı dəfələrlə artar və bu sahənin inkişafına təkan verilmiş olar.

Hazırda "Elektron hökumət” portalı vasitəsilə vətəndaşlara 9 növdə arayış - diplom haqqında, rabitə xidmətlərinə görə borcun olmaması barədə, şəxsiyyət vəsiqəsi və vətəndaşa aid fərdi məlumatlar üzrə, yaşayış yeri və iş yerinə dair elektron arayış verilir. Həmçinin vətəndaş haqqında "Tələbə-Məzun” dövlət elektron məlumat sistemindən çıxarış, ümumtəhsil məktəblərində çalışan pedaqoji və texniki heyətin iş yeri və şagirdlərin təhsil aldıqları yer haqqında e-arayış almaq mümkündür.

Hər bir e-arayış tərkibinə görə digər arayışlardan fərqlidir. Bütün e-arayışların ümumi cəhəti portal vasitəsilə avtomatik formalaşdırılması və eyni hüquqi qüvvəyə malik olmasıdır. Qeyd olunan e-arayışları çap etmək və ya aidiyyatı quruma göndərmək mümkündür. E-arayışların həqiqiliyini təsdiq etmək üçün QR-koddan istifadə edilir.

 Xeberler.az