TƏHLÜKƏSİZLİK

"Efirdə profilaktika işləri ilə bağlı NRYTN bütün ölkə ərazisində Radio və TV-lər işləməyəcəyini elan etmişdi. Çünki inhisarçı qurum olan Teleradio İstehsalat Birliyi belə istəyir. Efirə cavabdeh qurum olan MTRŞ isə milli teleradio qurumlarımız kimi sadəcə susub. Düzü, anlamıram MTRŞ 2019-cu ildə, bu qədər resurslara malik olduğumuz halda, müharibə şəraitində olduğumuz bir halda bununla necə razılaşa bilir. Xüsusən də, bir neçə gün öncə Prezident informasiya savaşının vacibliyindən danışırdı. Belə çıxır ki, biz vətəndaşlarımıza deməliyik ki , gözləyin, zəruri informasiyanı sizə axşam və ya sabah verəcəyik. Və ya düşmənlərə deməliyik ki, bu gün "atəş" açmayın , çünki biz bu gün sizə cavab verə bilməyəcəyik. Absurd bir vəziyyətdir"

Xeberler.az  məlumat verir ki, bu sözləri Azərbaycan İnternet Forumunun prezidenti, İKT sahəsi üzrə ekspert Osman Gündüz bildirib. Ekspert bu sahəyə resurslar;n, vəsaitlərin ayrılmalı olduğunu qeyd edib:

"Xatırlayıram ki bir - iki il öncə böyük vəsaitlər hesabına alternativ teleqüllə tikildi. Yəni hazırda NRYTN-nin inhisarçı qurumu olan Teleradio Birliyi ilə yanaşı ayrı bir teleqülləmiz də olmalıydı.  Bu alternativin də məhz profilaktikanın qarşısını almaq, dayanıqlı informasiya təminatı üçün qurulduğu bildirilirdi. Bəs nə baş verdi? 
Nə üçün yenidən bizim milli informasiya resurslarımz ildə bir neçə dəfə tam  susmalıdır. Bildiyim qədər cənub bölgəmizdə İranın 20 radiosu meydan sulayır, Şimal-Qərbdə Əyriçayı keçəndə Gürcüstan radioları efirimizə hökmranlıq edir. Digər sərhəd bölgələrimzidə də eyni situasiyadır. Hörmətli Nuşirəvan müəllimdən, Hökumətdən və Prezident Administrasiyasından soruşmaq istərdim ki necə ola bilər ki, uzun müddət bu proses davam etsin.