"Azərbaycan son zamanlar kibertəhlükəsizliklə bağlı mühiti xeyli inkişaf etdirə bilib. Bu, 44 günlük Vətən müharibəsi zamanı da özünü göstərib".
Xeberler.az bildirir ki, bu sözləri Azərbaycan İnternet Formunun Prezidenti Osman Gündüz deyib.
Ekspertin sözlərinə görə, son zamanlar bu istiqamətdə atılan addımların nəticəsi olaraq Azərbaycan Beynəlxalq Telekommunikasiya İttifaqının “Qlobal kibertəhlükəsizlik indeksi 2020” indeksində 15 pillə irəliləyərək 194 ölkə arasında 40-cı yerdə qərarlaşıb:
"Kibertəhlükəsizlik səviyyəsi üzrə qiymətləndirmə bir neçə istiqamət üzrə ( hüquqi tədbirlər, texniki tədbirlər, təşkilati tədbirlər, kadr potensialı və s.) aparılır. Ötən il qazanılan ciddi uğura baxmayaraq sektorda uzun müddətdir ki, həllini gözləyən problemlər də var. Bəlkə də bu problemlər zamanında həll olunsaydı Azərbaycan adı çəkilən indeksdə daha yüksək yer qazana bilərdi.
Dövlət sektorunda infromasiya təhlükəsizliyinə ötən il Prezident fərmanı ilə XDMX-nin ləğvi əsasında yaradılan Xüsusi Rabitə və İnformasiya Təhlükəsizliyi Dövlət Xidməti cavabdehdir.
Lakin cəmi 2 ay vaxt verilməsinə baxmayaraq ilyarımdan çoxdur ki, bu cür strateji əhəmiyyət kəsb edən qurumun strukturu və əsasnaməsi təsdiqlənməyib. 2018-ci ildə yaradılan İnformasiya Təhlükəsizliyi üzrə Koordinasiya Komissiyasına rəhbərlik də bu quruma həvalə edilib".
Osman Gündüz qeyd edib ki, bu Komissiyanın 2018-ci ildə hazırlamalı olduğu , kibertəhlükəsizlik sektoru üçün mühüm əmiyyət kəsb edən, "İnformasiya Təhlükəsizliyi üzrə Milli Strategiya" (2019-2024-cü illər) da uzun illərdir ki təsdiqlənə bilmir.
"Ötən il NRYTN və Xüsusi Rabitə və İnformasiya Təhlükəsizliyi Dövlət Xidməti bildiriblər ki, “İnformasiya təhlükəsizliyi və kibertəhlükəsizlik üzrə Milli Strategiya” üzərində birgə işlər başa çatdırılıb və sənəd hökumətə təqdim edilib. Lakin ondan da hələlik bir xəbər yoxdur.
Kibertəhlükəsizlik sahəsi ilə əlaqəli daha bir məsələ isə strateji əhəmiyyət daşıyan dövlət informasiya resurslarının təhlükəsizliyinin təminatı məsələsidir. Cari ilin əvvəli Prezident "Kritik informasiya infrastrukturunun təhlükəsizliyinin təmin edilməsi sahəsində bəzi tədbirlər haqqında” Fərman imzalayıb.
Fərmana görə DTX və Xüsusi Rabitə və İnformasiya Təhlükəsizliyi Dövlət Xidməti təhlükəsizlik baxımından auditi məcburi olan dövlət informasiya resurslarının siyahısını hazırlamalıdır ki, hələlik bununla bağlı da açıqlama verilməyib.
Düşünürəm ki, yuxarıda adı çəkilən məsələlərin həlli kibertəhlükəsizlik sahəsində ölkəmizin mövqeyini daha da gücləndirə bilərdi".
